ԵՐԵՎԱՆ, 5 ապրիլի. /Նովոստի-Արմենիա/. Աշխարհահռչակ շանսոնյե Շառլ Ազնավուրը, Մոսկվայում կայանալիք համերգի նախաշեմին, մասնակցել է ռուսական Առաջին հետուստաալիքի «Երեկոյան Ուրգանտ» հեռուստահաղորդմանը:
Շանսոնյեի հետ զրույցի ժամանակ Ուրգանտը հիշեցրել է, որ համերգի տոմսերի վաճառքից ստացված միջոցները փոխանցվելու են «Շառլ Ազնավուրի հիմնդադրամին», որն օգնում է աղքատ ընտանիքներին և փախստականներին:
«Հայաստանը օգնության կարիք ունի: Այն փոքր երկիր է` շրջապատված պետություններով, որոնցից որոշները ընկերներ են, որոշները` թշնամիներ: Ես կցանկանայի միայն ընկերներ տեսնել, սակայն հարկավոր է, որ իրենք էլ ունենան նույն մտածելակերպը, ինչ մենք», - ասել է Ազնավուրը:
Նրա խոսքով, դա հենց մտածելակերպի հարց է, այլ ոչ թե հիմքի կամ նավթի: «Դա ինձ չի հետաքրքրում, ինձ հետաքրքրում է, որ մարդը մարդ մնա», - նշել է Ազնավուրը:
Երգիչը նաև ավելացրել է, որ երջանիկ է գտնվել Ռուսաստանում, նրա հայրը միշտ մոտ է եղել ռուսական հասարակության հետ:
«Մենք մեծացել ենք ռուս երգիչների և երաժիշտների ազդեցության տակ: Հիշում եք Վերտինսկուն: Շատ երիտասարդներ նրան չեն ճանաչում, իսկ ես հիշում եմ», - ընդգծել է Ազնավուրը:
Ուրգանտի այն խոսքին, որ այս տարի Ազնավուրը կնոջ հետ տոնում է «ոսկե հարսանիքը», շանսոնյեն ասել է, որ «ցուրտն ամուսնացել է տաքի հետ: Նա շվեդուհի է, ես` հայ: Եվ, վերջապես, ջերմությունն ամուսնացել է ցրտի հետ. ամեն ինչ լավ է և ամուր»:
«Դա նաև ապրելու, ընկալելու ձև է այն, ինչ տեղի է ունենում, ինչպես դաստիարակել երեխաներին: Դրանք երկու տարբեր ձևեր են: Մենք ունենք տարբեր խոհանոցներ, տարբեր դաստիարակություն, տարբեր կրոն: Սակայն ամեն ինչ լավ ստացվեց, ինչն ապացուցում է այն փաստը, որ դա հնարավոր է», - կարծում է երգիչը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
