ԵՐԵՎԱՆ, 15 հունվար․/Նովոստի–Արմենիա/․ «Գոյ» փորձարարական թատրոնի ստեղծագործական խումբը բողոքի ակցիա է իրականացնում ՀՀ կրթության, գիտության, մշակույթի և սպորտի նախարարության շենքի դիմաց։ Նրանք պահանջում են վերանայել «Գոյը» Գաբրիել Սունդուկյանի անվան ազգային ակադեմիական թատրոնին միանացնելու որոշումը։
Նրանք տեղեկացել են, որ «Գոյ» թատրոնի նոր տնօրեն Կարեն Սիմոնյանը պատրաստվում է համապատասխան փաստաթուղթ ստորագրել նախարարությունում, ինչն առաջացրել է թատերախմբի վրդովմունքը։
«Իրենք (իշխանությունները, խմբ.) ոչինչ չեն ստեղծել և զբաղված են միայն ոչնչացմամբ։ Նրանց համար «Գոյը» քանդման համար նախատեսված հերթական օբյեկտն է։ Այս թատրոնը մեր տունն է, և մենք պատրաստ չենք հրաժարվել դրանից։ Նահանջելու տեղ չունենք»,- ասաց թատրոնի բեմադրող–ռեժիսոր Արթուր Սահակյանը։
Նա հիշեցրեց, որ այս հարցը ներկայումս քննվում է դատարանում, հետևաբար, ինչ որոշում էլ որ կայացնի նախարարությունը, այն անօրինական է լինելու, քանի որ դատաքննությունը շարունակվում է։
Նշենք, որ կառավարությունը 2023թ. մայիսի 11-ին որոշել է «Արմեն Մազմանյանի անվան բեմարվեստի ազգային փորձարարական «Գոյ» կենտրոն» ՊՈԱԿ-ը վերակազմակերպել` միացնելով «Գ. Սունդուկյանի անվան ազգային ակադեմիական թատրոն» ՊՈԱԿ-ին: Որպես նախագծի հիմնավորում նշված է, որ «Գոյ»-ը Սունդուկյանի անվան թատրոնի հետ գործում է նույն ենթակառուցվածքային համակարգում (շինություն, կոմունալ հանգույցներ և այլն): Շենքի տարբեր հարկերից, տարբեր չափերի տարածքներ առանձնացվել են և տրվել «Գոյ»-ին։ Այս ամենն առաջացնում է լոգիստիկ բազմաթիվ խնդիրներ։
Բացի այդ, նշված է նաև, որ «Գոյ»-ը թերակատարել է իր անվանմանը համապատասխան թատերական ոլորտում նորարարական-փորձարարական առաքելության իրականացումը, բացակայել է գովազդատեղեկատվական քաղաքականությունը, անհրաժեշտ է արդիականացնել գույքային և տեխնիկական բազան: Բացի այդ՝ մեկուսացել է ընդհանուր թատերական իրողություններից, պրոցեսներից և փոխակերպումներից, որն արտահայտվում է նաև միջազգային համագործակցության շրջանակներում և այլն:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
