Վեցօրյակը՝ երեք օրում, դիմակների կրումը, ռիսկային խմբերի երեխաների ուսուցանումը․ ԿԳՄՍՆ-ն ներկայացրել է նոր ուսումնական մանրամասները (ՎԻԴԵՈ)

ԵՐԵՎԱՆ, 26 օգոստոսի․ /Նովոստի-Արմենիա/․ ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը մամուլի ասուլիսի ժամանակ լրացուցիչ մանրամասներ է ներկայացրել դպրոցներում դասընթացների կազմակերպման համակարգի վերաբերյալ` կորոնավիրուսի և համավարակի պատճառով ներդրված հակահամաճարակային կանոններով պայմանավորված: 

Ի՞նչ ժամանակացույցով են սովորելու երեխաները 

Անդրեասյանը հիշեցրել է, որ Հայաստանի հանրակրթական դպրոցներում ուսումնական գործընթացը մեկնարկելու է սեպտեմբերի 15-ին՝ բացառությամբ առաջին դասարանցիների, որոնց համար գործընթացը կմեկնարկի սեպտեմբերի 14-ին։ Նոր ուսումնական տարում անցկացվելու է շաբաթական վեց օր հինգի փոխարեն: 

Դա պայմանավորված է նրանով, որ դասարանները, որոնցում սովորում է ավելի քան 20 աշակերտ, պետք է բաժանվեն երկու խմբի, որոնք տարբեր օրերին կգան դպրոց: Այսպիսով, յուրաքանչյուր խումբ շաբաթվա ընթացքում երեք անգամ դպրոց կհաճախի, իսկ մնացած ուսումնական օրերը կտրամադրվեն ինքնուրույն կրթությանը:

«Դա նաև հնարավորություն կտա դպրոցում միաժամանակ կրճատել մարդկանց թիվը, նվազեցնել հաղորդակցության ինտենսիվությունը: Միաժամանակ, ուսուցիչները պետք է կարգավորեն ուսումնական գործընթացը և ուսումնական պլանները առարկաներում, որպեսզի այն բաշխվի (խմբերի միջև)», - ասաց նա:

Արդյո՞ք ուսուցիչների աշխատանքային ժամերը կավելանան նույն դասարանի երկու խմբերի հետ աշխատելիս

Փոխնախարարը շեշտեց, որ չնայած դասերի խմբերի բաժանմանը, ուսուցիչների աշխատանքային ժամերի քանակը չի ավելանա: Նա նշեց, որ առարկայի ժամանակացույցը և ծրագիրը կազմվում են այնպես, որ ապահովվի լիարժեք կրթական գործընթացի տարանջատումը և ինքնուրույն աշխատանքը:

Ինչպե՞ս են հետևելու աշակերտների դիմակներ կրելուն

Անդրեասյանն ասաց, որ դիմակներ կրելու պահանջը գործում է և հանդիսանում էընդհանուր կանոն և ռեժիմ, ներառյալ դպրոցներում: Ըստ նրա, յուրաքանչյուր դպրոցում կնշանակվի անձ, ով պատասխանատու կլինի կորոնավիրուսի կանխարգելման և բոլոր համաճարակային կանոնների պահպանման համար:

«Դպրոցները որևէ լրացուցիչ կարգավորումներ չեն նախատեսում այս հարցում, այս գործընթացը կկազմակերպվի ինչպես երկրում ցանկացած այլ վայրում: Ինչ վերաբերում է վերահսկողությանը, ապա, ընդհանուր առմամբ, այս գործընթացը թողնում են տեսչական մարմիններին», - ասաց նա:

Ինչպե՞ս է կազմակերպվելու հեռավար ուսուցումը ռիսկային խմբի դպրոցականների համար

Փոխնախարարը նշեց, որ ռիսկի խմբում գտնվող ուսուցիչների և աշակերտների համար, ովքեր չեն կարող անձամբ հաճախել դասընթացներին, կկազմակերպվի կենտրոնացված հեռավար ուսուցում:

«Հեռավար ուսուցումը կազմակերպվելու է կենտրոնացված համակարգով, ինչը նշանակում է, որ մենք այս բեռը չենք թողնելու առանձին դպրոցների և ուսուցիչների ուսերին։ Սակայն գնահատման իրավասությունը թողնելու ենք դպրոցներին»,- նշեց Ժաննա Անդրեասյանը։ 

Նրա խոսքով ռիսկային խմբում գտնվող ուսուցիչները կունենան ընտրության հնարավորություններ, մասնավորապես՝ նրանց առաջարկվել է դպրոց հաճախել հատուկ պաշտպանիչ միջոցներով, որոնք կտրամադրի պետությունը, կամ դասերը հեռավար կազմակերպել, եթե դպրոցը կկարողանա ապահովել այդ պայմանները։ Երրորդ տարբերակն այն է, որ այս ուսուցիչները կարող են ընտրել ուղղակի աշխատանքի չներկայանալը, որի դեպքում, «Աշխատանքային օրենսգրքով» սահմանված կարգով՝ կներգրավվեն փոխարինող ուսուցիչներ։-0-