Վանաձորի ջրամատակարարումն առաջիկա ժամերին կվերականգնվի. վթարը վերացված է. «Վեոլիա Ջուր» (ՎԻԴԵՈ)

ԵՐԵՎԱՆ, 17 ապրիլի․ /Նովոստի-Արմենիա/․ Քիչ առաջ «Վեոլիա Ջուր» ընկերության «Լոռի» շահագործման տեղամասն ավարտեց «Նովոսելցովո - Վանաձոր» մայրուղային ջրատարի վթարի վերացումը։

Այս մասին հայտնել է «Վեոլիա Ջուր»-ը։

«Արդեն սկսվել է 1000 մմ-ոց ջրատարի վերագործարկումը։ Առաջիկա 4-5 ժամվա ընթացքում բնակավայրերի ջրամատակարարումն աստիճանաբար կվերականգնվի»,-նշվում է հաղորդագրության մեջ։

Նշենք, որ ապրիլի 16-ին Փամբակ-Վանաձոր ճանապարհահատվածում ավտոմեքենայի հարվածի հետևանքով վթարվել էր «Նովոսելցովո-Վանաձոր» 1000մմ-ոց մայրուղային ջրատարը։

Վթարի վերացման աշխատանքներով պայմանավորված, ս.թ. ապրիլի 16-ին ժամը 12:00-ից մինչև ապրիլի 17-ը ժամը 12:00-ն դադարեցվել էր Լոռու մարզի  բնակավայրերի մեծ մասի ջրամատակարարումը։