Թբիլիսիի իշխանությունը համոզված է, որ ջրհեղեղից հետո քաղաքում համաճարակի վտանգ չկա

ԵՐԵՎԱՆ, 16 հունիսի, /Նովոստի–Արմենիա/. Թբիլիսիի քաղաքապետարանի բարեկարգման ծառայության ղեկավար Ավթանդիլ Սուդաձեն բացառել է Թբիլիսիում համաճարակի տարածման վտանգը։ Հիշեցնենք, որ անցած հանգստյան օրերին ավերիչ ջրհեղեղը մեծ վնաս էր հասցրել Վրաստանի մայրաքաղաքին, գրում է Sputnik գործակալությունը։

Հունիսի 13–ի լույս 14–ի գիշերը Թբիլիսիում հեղեղվել էին կենդանաբանական այգին, Թամազ Էլիզբարաշվիլու` շների համար նախատեսված մասնավոր ապաստարանը, բնակելի տներ, քաղաքի կենտրոնական փողոցներ, վնասվել էր ենթակառուցվածքը։ Վերջին տվյալներով` մահացել է 17 մարդ, հինգը համարվում է անհետ կորած։

«Ակտիվ կատարվում են մաքրման աշխատանքներ։ Այսօր գերակա հատվածներ են համարվում «Մզիուրին» (այգի Վակեի շրջանում) և կենդանաբանական այգին։ Ինչ վերաբերում է մնացած մասին, հիմնական հատվածներն արդեն մաքրված են։ Համաճարակի տարածման վտանգն անձամբ ես համարում են անհիմն»,– հայտարարել է Սուդաձեն։

Նրա խոսքով`մաքրման աշխատանքները լիովին կավարտվեն ամենաշատը երկու օրից։

Միաժամանակ, կենդանաբանական այգու տարածքում մնում է  ջրհեղեղի արդյունքում սատկած կենդանիների մի մասը։ Թբիլիսիի քաղաքապետարանի աշխատակազմի հասարակայնության հետ կապերի ծառայության ղեկավար Մզիա Շարաշենիձեն հայտնել է, որ «այդ կենդանիներն այնտեղ են գտնվում արդեն երրորդ օրը, համապատասխանաբար որոշակի վարակների տարածման վտանգ կա»։

Ավելի վաղ տեղեկություն էր հրապարակվել, որ կենդանաբանական այգի են ժամանել երկու պատվիրակություններ Իսրայելից և Պրահայից, որոնք տարերային աղետների ժամանակ աշխատանքի ահռելի փորձ ունեն։-0-