Հայկական իջևանատուն են բացել Օրենբուրգում մարզի նահանգապետն ու Հայաստանի նախագահը

«Ազգային գյուղ» մշակութային համալիրի շրջանակներում թվով իններորդը դարձած հայկական իջևանատունն է այսօր բացվել Օրենբուրգում մարզի նահանգապետ Ալեքսեյ Չեռնիշևի և Հայաստանի  նախագահ Սերժ Սարգսյանի կողմից, տեղեկացնում է ԻՏԱՌ-ՏԱՍՍ-ը։

Ինչպես և մյուս իջևանատներում, այստեղ ներկայացված են ազգագրական թանգարան, ազգային գրադարան և ազգային խոհանոցի կերակրատեսակներ մատուցող սրճարան։ 

Ալեքսեյ Չեռնիշևը նշեց, որ իջևանատան բացումն օրենբուգցիների համար իսկապես նշանակալի իրադարձություն է, լավ նվեր մարզին՝ 75-ամյակի և Օրենբուրգի նահանգի ստեղծման 265-ամյակի կապակցությամբ։

«Հայերի հայտնվելու պատմությունը մեր երկրամասում ավելի քան երկու հարյուրամյակ է կազմում և կապված է Ռուսաստանի՝ Կենտրոնական Ասիայի հետ առևտրական հարաբերությունների զարգացման հետ։ Օրենբուրգի պատմության մեջ տեղ են գտել բազմաթիվ նշանավոր հայերի անուններ, որոնց թվում են Օրենբուրգի  ավիացիոն ուսումնարանի սաներ, Խորհրդային Միության հերոսներ Աշոտ Կասպարովը և Մարդիրոս Նաղուլյանը։ Երկրամասի բնակիչները սրբացնում և պահպանում են հայ նշանավոր բանաստեղծ, հասարակական գործիչ Վահան Տերյանի հիշատակը, ով Օրենբուրգում է անցկացրել իր կյանքի վերջին օրերը»,- ասել է Չեռնիշևը։

Սերժ Սարգսյանն իր հերթին նշել է, որ Օրենբուրգի նահանգ իր այցը Հայաստանի և Ռուսաստանի միջև ռազմավարական գործընկերության իրագործման մի մասն է։

«Լավագույն հայկական սփյուռքը բնակության երկրի օրինապաշտ քաղաքացիներն են»,- ընդգծել է նա՝ դիմելով ռուսաստանաբնակ հայրենակիցներին։

Մարդահամարի տվյալներով՝ մարզում բնակվում է 10,5 հազար հայ (տարածաշրջանի ողջ բնակչության 0,5 տոկոսը), որոնք ընդգրկված են թվաքանակով առավել խոշոր էթնիկական խմբերի տասնյակում։ -0-