«Դինոզավր» խաղալիքի մեջ հայտնաբերվել են թունավոր նյութեր, տրվել է ոչնչացման հանձնարարական․ կարգավորիչ
ԵՐԵՎԱՆ, 29 ապրիլի․/Նովոստի–Արմենիա/․ ՀՀ շուկայի վերահսկողության տեսչական մարմինը վերահսկողական միջոցառումներ է իրականացրել «Վազգեն Ամյան Սերյոժայի» ԱՁ-ում, որի արդյունքում վտանգավոր խաղալիք է հայտնաբերվել, հայտնում են տեսչական մարմին։
«Իրականացվել է խաղալիքի նմուշառում, որի արդյունքում պարզվել է, որ «Դինոզավր» անվանմամբ վաճառվող խաղալիքի բաղադրության մեջ առկա են երեխաների առողջության համար վտանգավոր (թունավոր) նյութեր», - նշված է հաղորդագրության մեջ։
Տեսչական մարմնի ղեկավար Արմեն Կոտոլյանը տվել է հանձնարարական՝ նշված անվանմամբ խաղալիքի հետկանչման և ոչնչացման վերաբերյալ։
Տեսչական մարմինը հորդորում է բոլոր սպառողներին, որոնք ձեռք են բերել վերոնշյալ խաղալիքից, կապ հաստատել Տեսչական մարմնի հետ և վերադարձնել դրանք՝ երեխաների առողջության համար հնարավոր վնասներից խուսափելու նպատակով։
