Քիշնևի անկարգությունների հովանավորները լքել են երկիրը, 118 կազմակերպիչներ ձերբակալվել են. Վորոնին

Մոլդովայի նախագահ Վլադիմիր Վորոնինը հայտարարել է, որ Քիշնևում կազմակերպված անկարգությունների հովանավորները լքել են երկիրը, սակայն 118 կազմակերպիչ ձերբակալվել է։

«Իրավապահ մարմինները ձերբակալել են Քիշնևի անկարգությունների 118 կազմակերպիչների, այս իրադարձությունների ամենահարուստ հովանավորներն արդեն հեռացել են երկրից», - ասել է նա չորեքշաբթի Կառավարության տանը քաղաքացիական հասարակության ներկայացուցիչների հետ հանդիպման ժամանակ, հաղորդում է «ՌԻԱ Նովոստին»։

Մոլդովայի խորհրդարանական ընտրությունների արդյունքների դեմ բողոքող մոլդովական ընդդիմության բողոքի ակցիաները երեքշաբթի Քիշնևում վերածվել էին փողոցային զանգվածային անկարգությունների։ Անկարգությունների մասնակիցներն ավերել են խորհրդարանի և նախագահի աշխատակազմի շենքերը։ Իրավապահ մարմինները հայտարարում են, որ այժմ իրենք վերահսկում են իրավիճակը Քիշնևում։

Վորոնինը նշել է, որ մինչև այժմ բնակչության որոշ մասի մոտ մնացել է «հզոր Ռումինիայի» գաղափարը։ Քիշնևում հանրահավաքի մասնակիցներից շատերը պահանջում էին Մոլդովայի և Ռումինիայի միացում, ինչից հետո Բուխարեստում Մոլդովայի դեսպան Լիդիա Գուցուին ետ էին կանչել Քիշնև՝ խորհրդակցությունների համար։

«Շատ վատ է, որ նրանք այս գործընթացների մեջ ներգրավում են բուհերի ուսանողներին և աշակերտներին։ Ժամանակին մենք ինչ-որ բան մինչև վերջ չենք արել», - ասել է Վորոնինը։-0-