ՀՐԱՏԱՊ. Հայաստանում կորոնավիրուսով վարակվածների թիվը հասել է 8-ի (ՎԻԴԵՈ)
15:13
13 Մարտի 2020
ԵՐԵՎԱՆ, 13 մարտի./Նովոստի-Արմենիա/. Հայաստանում կորոնավիրուսով վարակվածների թիվը հասել է 8-ի: Այս մասին իր Facebook-յան ուղիղ եթերում հայտարարել է ՀՀ առողջապահության նախարար Արսեն Թորոսյանը:
«Մեկուսացված անձանց շրջանակից, ովքեր մեկուսացվել էին շփում ունենալու պատճառով մեկ հաստատված պացիենտի հետ, խոսքը Էջմիածնի պացիենտի մասին է, 2 դրական հաստատված թեստ ունենք: Այսինքն այն անձինք, ովքեր մեկուսացվել էին՝ ունենալով գանգատներ, տեղափոխվել են ինֆեկցիոն հիվանդանոց, և նրանց մոտ կորոնավիրուսը դրական է ցույց տվել»,- նշել է նախարարը:
Թորոսյանը հայտնել է, որ հիվանդներն այս պահին իրենց լավ են զգում, գանգատներ չունեն՝ նշելով, որ համաճարակաբանական առումով դա լավ է, և կարող է փաստել, որ սրանք 4 անկախ դեպքեր են և ոչ թե 8:
Հիշեցնենք, որ Հայաստանում այս պահին գրանցվել է կորոնավիրուսով վարակի 6 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում: Մեկուսացվել է 57 մարդ։ Այնուհետև մարտի 12-ին գրանցվել է կորոնավիրուսով վարակման ևս 2 դեպք: -0-