ԵՐԵՎԱՆ, 11 մայիսի. /Նովոստի–Արմենիա/. Թուրքական խորհրդարանի հայազգի պատգամավոր Գարո Փայլանին սատարելու նպատակով երթ է անցկացվել Երևանի կենտրոնում։
Հիշեցնենք, որ օրեր առաջ նա հարձակման էր ենթարկվել Թուրքիայի խորհրդարանում։
Մոտ երեք շաբաթ առաջ Փայլանը թուրքական մեջլիսի նիստում պահանջել էր հետաքննություն անցկացնել Օսմանյան կայսրությունում 1915 թվականի Ցեղասպանության ժամանակ սպանված հայ մտավորականների սպանության կապակցությամբ։
Ակցիայի մասնակիցները հասել են մինչև ՄԱԿ–ի երևանյան գրասենյակ և աշխատակիցներից մեկին ուղերձ են փոխանցել` ի դեմս ՄԱԿ–ի միջազգային հանրությունից պահանջելով Թուրքիայում Փայլանի անվտանգության ապահովման քայլեր ձեռնարկել։ ՄԱԿ–ի գրասենյակի քարտուղարությունից երթի մասնակիցներին հայտնել են, որ ուղերձը կփոխանցվի ՄԱԿ–ի երևանյան գրասենյակի մշտական համակարգող Բրեդլի Բուզետոյին, հենց որ նա վերադառնա Հայաստան։
Փայլան. Թուրքիայի խորհրդարանի միջադեպը «Լինչի դատաստանի» փորձ էր>>
«Եթե հայը պաշտպանում է ողջ հայության շահերը, ապա հայությունն էլ կպաշտպանի հայ ժողովրդի զավակին»,– հայտնեց կազմակերպիչներից մեկը` Հայկանուշ Ալոյանը։ Ըստ նրա, նամակում շարադրվում է հայերի նկատմամբ Թուրքիայում ռասայականության դրսևորումների և իրավախախտումների մանրամասն ցուցակը։
Ալոյանը նշեց, որ միջազգային հանրությունը պետք է ճնշում գործադրի Թուրքիայի նկատմամբ այդ երկրում մարդու իրավունքների ոտնահարման բազմաթիվ դեպքերի կապակցությամբ։
Ակցիայի մեկ այլ նախաձեռնող Մարկ Հովհաննիսյանի խոսքով, միջազգային կազմակերպությունները հաճախ չեն կատարում իրենց պարտավորությունները` աչք փակելով տարբեր երկրներում տեղ գտած բազմաթիվ իրավախախտումներին։ Ըստ նրա, դրա վառ օրինակը միջազգային կազմակերպությունների արձագանքն է Ադրբեջանի ապրիլյան ագրեսիային։
«Մենք ցանկանում ենք հասնել Գարոյի հասցեին թուրքական իշխանությունների սպառնալիքների չեզոքացմանը, և ՄԱԿ–ը պետք է ստանձնի այդ անվտանգությունն ապահովելու պատասխանատվությունը։ Կարևոր է, որ այսօր մենք լռեցնում ենք այդ խնդիրը»,– ասաց նա։
Տարածաշրջանային հարցերի փորձագետ, ղարաբաղյան պատերազմի մասնակից Սարգիս Հացպանյանը հայտնեց, որ Թուրքիայի հայ համայնքի յուրաքանչյուր անդամին ապրիորի սպառնում է Հրանտ Դինքի ճակատագրին արժանանալը։ -0-
