Առաջարկվում է վերականգնել Նավասարդը՝ որպես ավանդույթների տոն
ԵՐԵՎԱՆ, 19 հունիսի․/Նովոստի–Արմենիա/․ ԱԺ–ն հինգշաբթի նիստում առաջին ընթերցմամբ ընդունեց «Հայաստանի Հանրապետության տոների և հիշատակի օրերի մասին» օրենքում փոփոխություններ կատարելու մասին նախագիծը։
Նախաձեռնության հեղինակ, պատգամավոր Գեղամ Նազարյանը հայտարարեց, որ առաջարկվող փոփոխությունները հիմնականում պահպանում են գործող տոներն ու հիշատակի օրերը, սակայն նախատեսում են դրանց կանոնակարգում։
«Առաջարկում եմ նաև օրենքում ներառել նոր տոն՝ Նավասարդը՝ այն ամրագրելով որպես հայերի ազգային ավանդույթների, մշակույթի և միասնության օր։ Առաջարկում եմ այն նշել օգոստոսի 11-ին։ Այս տոնը կնպաստի ազգային մշակույթի պահպանմանն ու հանրայնացմանը, ինչպես նաև կարևոր ամսաթիվ կդառնա սփյուռքի ներկայացուցիչների այցելությունների և հանդիսություններին մասնակցելու համար։ Ընդ որում, առաջարկում եմ օրը դարձնել աշխատանքային»,- ասաց Նազարյանը։
Նրա խոսքով՝ ևս մեկ առաջարկ վերաբերում է ազգային փոքրամասնությունների համար առանձին տոնական կամ հիշատակի օրեր սահմանելուն՝ որպես ոչ աշխատանքային։
Պատգամավորն առաջարկում է նաև դիտարկել ոչ աշխատանքային օրերի կամ այլ լուծումների հարցը մեռելոց օրերի վերաբերյալ։
«Երևանի օրվա համանմանությամբ առաջարկվում է նաև տոնական օրեր սահմանել մարզերի համար՝ հաշվի առնելով կլիմայական առանձնահատկությունները։ Նման տոները կնպաստեն ներքին զբոսաշրջության զարգացմանը»,- նշեց Նազարյանը։
Կառավարության դիրքորոշումը ներկայացրեց Աշխատանքի և սոցիալական հարցերի նախարարի տեղակալ Լուսինե Քոչարյանը։ Նրա խոսքով՝ գործադիրը մի շարք առաջարկներ է ներկայացրել, որոնք նախաձեռնության հեղինակը կդիտարկի առաջինից երկրորդ ընթերցմամբ քննարկումների միջև ընկած ժամանակահատվածում։ Առաջարկների մի մասին կառավարությունն աջակցել է։
