ԵՐԵՎԱՆ, 17 հունվարի./Նովոստի–Արմենիա/. ԱԺ–ում ահաբեկչության կազմակերպման համար ցմահ դատապարտված Նաիրի Հունանյանը նամակ է հղել ՀՀ վարչապետ Նիկոլ Փաշինյանին։ Այս տեղեկատվությունը «Նովոստի–Արմենիա» գործակալությանը հաստատեց կառավարության աշխատակազմի տեղեկատվության և հասարակայնության հետ կապերի վարչության պետի պաշտոնակատար Արմեն Խաչատրյանը։
Հայկական թերթերից մեկում հրապարակված տեղեկատվության համաձայն, նամակում Հունանյանը ողջունել է հոկտեմբերի 27-ի անջատված մասով նախաքննությունը վերսկսելու որոշումը եւ պատրաստակամություն է հայտնել մասնակցել գործի քննությանը՝ խոստանալով ջանք չխնայել և աջակցել կազմակերպիչների բացահայտմանը։ Նա նշել է, որ ինքն այդ գործով «ասելիք ունի»։
«Մենք կարող ենք հաստատել Հունանյանից նամակ ստանալու փաստը, սակայն նամակի բովանդակությունը հրապարակման ենթակա չէ», – ասաց Խաչատրյանը։
2019թ.–ի դեկտեմբերի վերջին ՀՀ գլխավոր դատախազությունը որոշեց բավարարել հոկտեմբերի 27-ի քրեական գործը կարճելու մասին որոշման դեմ բողոքը, որը ներկայացրել էր ահաբեկչության զոհերից մեկի կինը` Անահիտ Բախշյանը։
1999թ.-ի հոկտեմբերի 27-ին մի խումբ ահաբեկիչներ, ներխուժելով Հայաստանի Ազգային ժողովի նիստերի դահլիճ, գնդակահարեցին այնտեղ գտնվող երկրի ղեկավարներին, խորհրդարանի և կառավարության անդամներին։
20 տարի առաջ` 1999թ.–ի հոկտեմբերի 27–ին, ՀՀ Ազգային Ժողովի նիստերի դահլիճում Նաիրի Հունանյանի հանցախմբի ոճրագործության զոհ դարձան ԱԺ նախագահ, Ազգային հերոս Կարեն Դեմիրճյանը, վարչապետ, Ազգային հերոս Վազգեն Սարգսյանը, ԱԺ փոխնախագահներ Յուրի Բախշյանը, Ռուբեն Միրոյանը, արցախյան ազատամարտի հերոս, պատգամավոր Արմենակ Արմենակյանը, պատգամավորներ Միքայել Քոթանյանը, Հենրիկ Աբրահամյանը և նախարար Լեոնարդ Պետրոսյանը։
Ահաբեկիչների դատը սկսվել է 2001թ.-ին և ավարտվել 2003-ին: Մեղադրող կողմը պահանջում էր առավելագույն պատժամիջոց, սակայն 2003թ.-ի սեպտեմբերին Հայաստանում մահապատիժը վերացվեց՝ ԵԽ պարտավորություններին համապատասխան:
Ցմահ ազատազրկման դատապարտվեցին վեց ահաբեկիչներ, այդ թվում` հանցախմբի պարագլուխ Նաիրի Հունանյանը, նրա եղբայր Կարեն Հունանյանը, նրանց քեռին՝ Վռամ Գալստյանը, ինչպես նաև Դերենիկ Բեջանյանը, Էդիկ Գրիգորյանը և Աշոտ Կնյազյանը։ Համլետ Ստեփանյանը դատապարտվեց 14 տարի ազատազրկման:
Բոլոր յոթը մեղավոր են ճանաչվել ՀՀ ՔՕ մի շարք հոդվածներով՝ հայրենիքի դավաճանություն, ահաբեկչություն, հատկապես վտանգավոր պետական հանցագործությունների իրականացում։-0-