Ինչու՞ էր 37–ամյա որդին երևանյան հյուրանոցում կտրել 75–ամյա մոր պարանոցը. հրապարակվել են դեպքի ողջ մանրամասները

ԵՐԵՎԱՆ, 16 մայիսի./Նովոստի–Արմենիա/. Ապրիլի 16–ին Երևանում սարսափելի դեպք էր տեղի ունեցել. որդին փորձել էր սպանել մորը` կտրելով նրա պարանոցը։

Դեպքը տեղի էր ունեցել Երևանի հյուրանոցներից մեկում։ Հյուրանոցի սենյակում ծագած վիճաբանության ժամանակ 37-ամյա տղամարդը ծեծել էր 75–ամյա մորը, դանակով կտրել պարանոցը, ինչից հետո փորձել էր դիմել փախուստի` նետվելով հյուրանոցի 4-րդ հարկի բաց պատշգամբից, սակայն ոտքի վնասվածք էր ստացել։

Ինչպես նշվում է Քննչական կոմիտեի հրապարակած ռեպորտաժում, դեպքից 7 ամիս առաջ մահացել էր տղայի հայրը, մայրն ուներ առողջական խնդիրներ։ Վիրահատությունից հետո, երբ մայրը եկել էր տուն, տղան ցուցաբերել էր տարօրինակ վարքագիծ, սկսել էր չսնվել, չքնել, մշտապես ունեցել է տագնապի զգացողություն, մորն ասել է, որ իրենց հետևում են և պետք է ապահովության համար գնան այլ տեղ` ժամանակավոր բնակվելու։

Քննությամբ հաստստվել է, որ որդին երբևէ խնդիրներ չի ունեցել այլ անձանց հետ, փոխարենը աչքի է ընկել դրական վարքագծով։

Քննիչ Լյովա Թորոսյանի խոսքով, նախաքննության ընթացքում հարցաքննվել են վկաներն ու տուժող կինը։

«Տուժողն իր ցուցմունքով հայտնել է, որ վերջին ժամանակահատվածում` դեպքից մոտ մեկ ամիս առաջ, որդու մոտ ի հայտ են եկել այնպիսի ախտանշաններ, որոնք բնորոշ են ներկա պահին նախաքննությամբ չպարզված շիզոֆրենիա տիպի հոգեկան հիվանդությանը։ Որդին դեպքից մոտ մեկ ամիս առաջ սկսել է չուտել, չքնել, չխմել, երեկոյան ժամերին ավելի շատ ծխել։ Նրա մոտ տպավորություն է եղել, որ ինչ–որ անձինք հետապնդում են իրեն։ Այդ հանգամանքի հիման վրա դեպքի օրը, երբ առավոտյան դուրս են եկել մոր հետ միասին, որդին պատճառաբանել է, որ իրենց հետապնդում են, կարող է ինչ–որ անձինք գան իր հետևից, և մորը համոզել ու տարել է դեպի հյուրանոց։ Հասնելով հյուրանոցային համար, առանց պատճառաբանության, որդին հայտնել է, որ ցանկանում է մորը մորթել», – նշել է Թորոսյանը։

Կինը որդուց նման բան երբևի չի սպասել։ Հասկանալով, որ որդին վճռական է տրամադրված և ոչինչ նրան չի կարող ստիպել հետ կանգնել իր որոշումից, մայրը պարզապես որդուն խնդրել է դեմքը չվնասել։

Քննիչի խոսքով, նախաքննությամբ պարզվել է, որ որդին ավարտին չհասցնելով իր դիտավորությունը, որին միջամտել է հյուրանոցի մենեջերը, ցանկացել է փախուստի դիմել հյուրանոցի համարից, որից միակ անվտանգ ելքը եղել է պատուհանը, որը տարել է դեպի տանիք։ Տղան ցանկացել է տանիքից ոտքը դնել օդորակիչի մարտկոցի վրա և այդ կերպ իջնել մինչև ներքև, բայց ոտքը սայթաքել է և 4–րդ հարկից ընկել է ներքև` ստանալով աջ ոտքի, կողոսկրի և կոնքի կոտրվածքի, որի համար ստացել է համապատասխան ստացիոնար բուժօգնություն։

Նկատելով ընկած և վնասված տղային` աշխատակիցը մոտեցել և զրուցել է նրա հետ` սպասելով ոստիկանների ժամանմանը։
Քննչական նշում են, որ նշանակված են դատաբժշկական մի շարք փորձաքննություններ, որոնք արդյունքով հնարավոր կլինի ստանալ հուզող հարցերի բոլոր պատասխանները։–0–