«Իմ քայլը» բոյկոտեց Երևանի Ավագանու նիստը, Մարությանն էլ ուրախ լուր հայտնեց (ՎԻԴԵՈ)
Ինչպես նիստը բացելիս հայտարարեց Երևանի քաղաքապետ Հայկ Մարությանը, քվորումն ապահովված չէ, ինչի կապակցությամբ հայտարարվում է կես ժամ ընդմիջում: Եթե քվորում կրկին չհավաքվի, նիստը կհետաձգվի:
Նա, օգտվելով առիթից, երևանցիներին հայտնեց հիանալի նորություն՝ քաղաքի վերելակային տնտեսության թարմացման հետ կապված:
«Այսօր հայտարարվել է ևս 280 նոր վերելակների ձեռք բերման տենդեր: 2020թ.-ին տեղադրվել է 54 վերելակ, որոնք հատուկ նախատեսված են այն շենքերի համար, որտեղ բնակվում են ռազմական գործողությունների հետևանքով հաշմանդամություն ստացած քաղաքացիներ: 48 վերելակների տենդերն ընթացքի մեջ է, մինչ այդ ընդհանուր առմամբ տեղադրվել է 520 վերելակ», - ասաց Մարությանը:
Եվս 100 վերելակի մասով մրցույթն ավարտվել է: Այսպիսով, ինչպես տեղեկացրեց Մարությանը, Երևանում կտեղադրվի (կփոխարինվի) 1000 բոլորովին նոր վերելակ:
Նշենք, որ դեկտեմբերի 22-ին «Իմ քայլը» խմբակցության նախաձեռնությամբ Ավագանու խորհրդում տեղի կունենա քննարկում Երևանի քաղաքապետի լիազորությունները ժամկետից շուտ դադարեցնելու հարցով:
Մարությանի շուրջ տեղի ունեցող վերջին իրադարձությունների մասին
Դեկտեմբերի 12-ի ուշ երեկոյան «Հայկական ժամանակ» թերթի կայքում, որի խմբագիրն էր գործող վարչապետ Նիկոլ Փաշինյանը, իսկ հիմա այն գլխավորում է Փաշինյանի կինը՝ Աննա Հակոբյանը, հայտնվել էր հոդված «Հայկ Մարությանին «հեղափոխությունից շեղած» գեներալները» վերտառությամբ։ Հոդվածում նշվում է, որ ըստ շրջանառվող տեղեկությունների՝ պատերազմի ավարտից հետո Մարությանը դիմում է ներկայացրել «Քաղաքացիական պայմանագիր» կուսակցությունից հեռանալու մասին և խզել հարաբերություններն իշխող ուժի անդամների հետ:
Այժմ, շրջանառվող տեղեկությունների համաձայն, Մարությանը իր քավորի՝ Ամարասի Արթուրի միջոցով նաև սերտ հարաբերություններ է հաստատել մեկ այլ գեներալի՝ ԱԺ «Հայաստան» խմբակցության ղեկավար Սեյրան Օհանյանի հետ, որը նույնպես Ամարասի Արթուրի սանիկն ու մտերիմ ընկերն է:
«Տեղեկություններ են շրջանառվում նաև այն մասին, որ պատերազմի ավարտից հետո Հայկ Մարությանը Սեյրան Օհանյանի միջնորդությամբ հանդիպել է Ռոբերտ Քոչարյանի հետ: Հատկանշական է, որ նրա հետ հանդիպումից հետո Մարությանի նկատմամբ շատ լոյալ դիրք են գրավել նաև Ռոբերտ Քոչարյանի ենթակայության տակ գտնվող լրատվամիջոցները», - նշվում է հոդվածում։
Քաղաքապետարանի արձագանքը
Երևանի քաղաքապետարանի մամուլի խոսնակ Հակոբ Կարապետյանը չցանկացած մեկնաբանել Մարությանի մասին հոդվածը՝ նշելով, որ դա բամբասանք է։
«Վերջին երեք տարիների ընթացքում դեղին մամուլը Երևանի քաղաքապետի անձի ու գործունեության մասին ինչ ասես գրել է։ Ձեր մեջբերած հոդվածը դրանցից մեկն է, ոչ մի արտառոց բան չկա։ Ես իսկ դեղին մամուլի բամբասանքները չեմ մեկնաբանում», - հայտարարել է Կարապետյանը Panorama-ին։
Արձագանքելով այն հարցին, որ խոսքը այսօր վարչապետի աթոռը զբաղեցնող Նիկոլ Փաշինյանի ընտանիքին պատկանող լրատվամիջոցի մասին է՝ Կարապետյանը նշել է․ «Ես որևէ այլ մեկնաբանություն այդ հարցի հետ կապված չունեմ»։
Իրականությու՞ն, թե ֆանտաստիկա
Ազգային ժողովի «Հայաստան» խմբակցության պատգամավոր Արամ Վարդևանյանը ևս անդրադարձել է «Հայկական ժամանակ» կայքում հրապարակված հոդվածին։
«Առհասարակ, կարծում եմ՝ ԶԼՄ-ն, երբ նման տեսակ գնահատաականներ է հնչեցնում, պետք է որ ելակետը լինի փաստական հանգամանքը, ոչ թե ֆանտաստիկայի կամ հեքիաթային ժանրի ոլորտը», - մեջբերում է Վարդևանյանի խոսքերը aysor.am-ը։
ԱԺ-ում ճեպազրույցի ժամանակ Վարդևանյանն ավելացրել է, որ եթե լիներ նման հանդիպում, հանրությունը տեղեկացված կլիներ։-0-
