ԵՐԵՎԱՆ, 8 մարտի․/Նովոստի–Արմենիա/․ Երևանի ավագանու առաջիկա նիստում կքննարկվի միասնական տոմսային համակարգի լրամշակված նախագիծը, հայտնել է Երևանի քաղաքապետարանի մամուլի քարտուղար Հայկ Կոստանյանը։
«Սիրելի՛ երևանցիներ, հարգելի՛ գործընկերներ, միասնական տոմսային համակարգի լրամշակված նախագծով, որը կքննարկվի ավագանու առաջիկա նիստում, նախատեսվում է ՝
- 30 օրվա համար 8800 դրամ՝ անսահմանափակ երթևեկելու հնարավորությամբ։
- 90 օրվա համար 23600 դրամ՝ անսահմանափակ երթևեկելու հնարավորությամբ։
- 365 օրվա համար 88000 դրամ՝ անսահմանափակ երթևեկելու հնարավորությամբ։
Ցանկացած փաթեթ ձեռք բերելու դեպքում քաղաքացիները կարող են օգտվել հասարակական տրանսպորտի բոլոր միջոցներից։
Ուսանողների, բնակչության սոցիալական կամ հատուկ խմբերի համար կկիրառվեն զեղչեր», – գրել է Կոստանյանը Facebook–յան իր էջում։
Ավագանին ավելի վաղ առաջարկել էր Երևանի հասարակական տրանսպորտի սակագները փոխելու նախագիծ։ Առաջարկվում էր ներդնել սակագների դասակարգում՝ ուղեվարձի թանկացումով գրեթե բոլոր կատեգորիաներում։ Նախատեսվում էր, որ նախագծի հաստատման դեպքում նոր սակագները ուժի մեջ կմտնեն 2024 թվականի սեպտեմբերի 1-ից։ Այնուամենայնիվ, նախագիծը հանվեց նիստի օրակարգից հասարակության շրջանում բացասական արձագանքի պատճառով։
Երևանի փոխքաղաքապետ Սուրեն Գրիգորյանն ավելի վաղ հայտնել էր, որ այսօր հասարակական տրանսպորտով մեկ ուղևորության ինքնարժեքը մոտ 200 դրամ է։ Նախագիծը միտված է որոշակի չափով նվազեցնելու սուբսիդավորման ծավալը, որը ներկայումս բավականին մեծ է։ Նրա խոսքով, նոր համակարգը հնարավորություն կտա նաև ձերբազատվել հասարակական տրանսպորտում միջոցների ստվերային շրջանառությունից։-0-