Նախորդ շաբաթվա կարևոր նորությունների հնգյակը

ԵՐԵՎԱՆ, 3 սեպտեմբերի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։

• Հայաստանի նախագահ Սերժ Սարգսյանը և գիտության և կրթության նախարար Լևոն Մկրտչյանը չորեքշաբթի անցկացրել են պարգևատրման արարողություն, որի ընթացքում պարգևների են արժանացել «Կենգուրու» և «Մեղու» մրցույթների հաղթողներ, միջազգային օլիմպիադաների դափնեկիրներ, ինչպես նաև մեդալակիրներ։ Պարգևատրման արարողության ժամանակ նախագահը խոստովանել է, թե որ մասնագիտության մասին է երազել մանկության և պատանեկության տարիներին։ «Կենգուրու» դպրոցական մաթեմատիկական մրցույթի ամենափոքր հաղթողը դիմել է Հայաստանի նախագահ Սերժ Սարգսյանին խնդրանքով։ Փոքրիկը չի ցանկացել բարձրաձայնել իր խնդրանքը և խնդրել է շշնջալ այն պետության նախագահի ականջին։

• Հայկական դատարանը մերժել է ԱՄՆ իշխանությունների կողմից հետախուզվող ՌԴ քաղաքացի Սերգեյ Միրոնովի կալանավորման մասին միջնորդությունը։ Փակ ռեժիմով անցկացված դատական նիստում դատավորն անհիմն համարեց դատախազության միջնորդությունը և ազատեց Միրոնովին։ Ավելի վաղ Միրոնովն ասել էր, թե իր հետ կատարվածը թյուրիմացություն է համարում։ Նա հայտարարել է, որ գոհ է հայկական իշխանությունների վերաբերմունքից:

• Հայաստանի ֆուտբոլի հավաքականն արտագնա խաղում պարտվեց չեխերին ընկերական խաղում: Մլադա Բոլեսլավ քաղաքի մարզադաշտում անցկացված խաղն ավարտվեց 3:0 հաշվով՝ հօգուտ Չեխիայի հավաքականի: Հանդիպման 38-րդ րոպեին վնասվածք ստացավ «Մանչեսթեր Յունայթեդի» կիսապաշտպան Հենրիխ Մխիթարյանը: Ավելի ուշ պարզ դարձավ, որ Դանիայի հավաքականի հետ Մխիթարյանի խաղալու հավանականությունը 50-50 է։

• ՀՀ էներգետիկայի և բնական պաշարների նախարարությունը պարզաբանում է ներկայացրել` կապված մամուլում շրջանառվող տեղեկություններին այն մասին, որ «Երևանի ՋԷԿ»-ը կարող է վաճառվել «Գազպրոմին» կուտակած պարտքերի դիմաց։

• Հունահռոմեական ոճի հայ ըմբիշ Սերգեյ Սիմոնյանը (50 կգ) հաղթել է ադրբեջանցի մարզիկ Զիյադ Զեյնալովին Ֆրանսիայում մեկնարկած Ըմբշամարտի աշխարհի երիտասարդական առաջնությունում։ Արդյունքում, Սիմոնյանը նվաճել է առաջնության բրոնզե մեդալը։ –0–