ԱՀ ՊՆ պարզաբանում և մանրամասներ է ներկայացնում զինծառայող Գևորգ Հարոյանին ինքնասպանության հասցնելու դեպքի մասին

ՍՏԵՓԱՆԱԿԵՐՏ, 12 հոկտեմբերի./Նովոստի–Արմենիա/. ՊԲ զինծառայող Գևորգ Սուրենի Հարոյանի մահվան հանգամանքների վերաբերյալ վերջին օրերին համացանցում տարածվող տարատեսակ մեկնաբանություններին վերջ դնելու և հանրությանը իրազեկելու նպատակով Արցախի Հանրապետության պաշտպանության նախարարության տեղեկատվության և հասարակայնության հետ կապերի բաժինը ներկայացնում է ՀՀ ՔԿ ԶԳԳՎ առաջին կայազորային քննչական բաժնում հարուցված քրեական գործի վերաբերյալ տեղեկությունը, նշվում է ԱՀ ՊՆ մամուլի ծառայությունը։

Ս.թ. հոկտեմբերի 1-ին՝ ժամը 10:50-ի սահմաններում, ՊԲ հարավարևելյան ուղղությամբ տեղակայված զորամասերից մեկի զինծառայող, շարքային Գ. Ս. Հ.-ն վաշտի զինանոցում մաքրության կատարելու ընթացքում համածառայող Գ. Հ. Ց.-ին ամրակցված ինքնաձիգից կրակոց է արձակել իր կրծքավանդակի ձախակողմյան հատվածում և տեղափոխվել զինվորական հոսպիտալ, որտեղ նույն օրը՝ ժամը 15:05-ին մահացել է:

Կատարված նախնական և անհետաձգելի գործողությունների արդյունքները բավարար հիմքեր են տվել ենթադրելու, որ Գ. Հ.-ն մահացել է իր իսկ գործողությունների արդյունքում:

Փաստի առթիվ հոկտեմբերի 1–ին ՀՀ ՔԿ ԶՔԳՎ առաջին կայազորային քննչական բաժնում հարուցվել է քրեական գործ՝ ՀՀ ՔՕ 110-րդ հոդվածի 1-ին մասի հատկանիշներով (ինքնասպանության հասցնելը):  

Նախաքննությամբ պարզվել է, որ դեպքի նախորդ օրերին, նույն վաշտի զինծառայողներ՝ կրտսեր սերժանտ Մ. Չ.-ի (Արմավիրի ԶԿ) և շարքային Գ. Հ.-ի միջև տեղի ունեցած վիճաբանության ընթացքում Մ. Չ.-ն բռնություն է գործադրել և կոպիտ հայհոյանք հնչեցրել Գ. Հ.-ի հասցեին: Վիճաբանությանը միջամտել է նույն վաշտի ժամկետային զինծառայող, կրտսեր սերժանտ Դ. Ս.-ն (Էրեբունու ԶԿ)և մեկ անգամ հարվածել Գ. Հ.-ին:

Վաշտի հրամանատար, կապիտան Լ. Պ.-ն (Գյումրիի ԶԿ), տեղյակ լինելով վերոնշյալ դեպքի մասին, թաքցրել է դեպքը, իսկ դեպքի նախորդ օրը՝ երեկոյան՝ քուն հրամանից հետո, իր աշխատասենյակում նախատել, դիտողություն է արել Գ. Հ.-ին, ստորացուցիչ հայհոյանք հնչեցրել նրա հասցեին:

Հոկտեմբերի 2–ին կրտսեր սերժանտ Մ. Չ.-ն ձերբակալվել է:


Ձեռք բերված ապացույցների հիման վրա հոկտեմբերի 4–ին Մ. Չ.-ին մեղադրանք է առաջադրվել ՀՀ ՔՕ 358.1-րդ հոդվածի 4-րդ մասով (ստորադասի նկատմամբ բռնի գործողություններ կատարելը կամ դրանք կատարելու սպառնալիքը): Վերջինիս նկատմամբ որպես խափանման միջոց է կիրառվել կալանավորումը:

Հոկտեմբերի 4–ին Լ. Պ.-ն ևս ձերբակալվել է:

Ձեռք բերված ապացույցների հիման վրա հոկտեմբերի 7–ին Լ. Պ.-ին մեղադրանք է առաջադրվել ՀՀ ՔՕ 375-րդ հոդվածի 1-ին մասով (iշխանությունը չարաշահելը, իշխանազանցությունը կամ իշխանության անգործությունը) և ՀՀ ՔՕ 360-րդ հոդվածի 2-րդ մասով (զինծառայողին վիրավորանք հասցնելը): Վերջինիս նկատմամբ որպես խափանման միջոց է կիրառվել կալանավորումը:

Հոկտեմբերի 9–ին ՀՀ ՔՕ 358.1-րդ հոդվածի 2-րդ մասով (ստորադասի նկատմամբ բռնի գործողություններ կատարելը կամ դրանք կատարելու սպառնալիքը) մեղադրանք է առաջադրվել նաև Դ. Ս.-ին: Վերջինիս նկատմամբ, որպես խափանման միջոց է կիրառվել զորամասի հրամանատարության հսկողության հանձնելը:–0–