Երևանի նոր տրանսպորտային համակարգի ներգրավման համար անհրաժեշտ է 850 ավտոբուս. առաջին խմբաքանակը Երևանում կլինի 2020 թ.–ի ընթացքում
ԵՐԵՎԱՆ, 25 դեկտեմբերի./Նովոստի–Արմենիա/. Երևանի քաղաքապետարանը բանակցություններ է վարում ամենախոշոր միջազգային բանկերի հետ՝ մայրաքաղաքում նոր տրանսպորտային ցանց ներգրավելու համար վարկ ստանալու նպատակով։ Այս մասին չորեքշաբթի լրագրողներին հայտնեց Երևանի քաղաքապետ Հայկ Մարությանը։ Նա նշել է, որ խոսքը 120-250 մլն դոլարի մասին է, տոկոսադրույքը դեռ որոշված չէ։
«Մենք կառավարության հետ եկել ենք համաձայնության, որ նոր տրանսպորտային ցանցի ներդրումն իրականացվելու է վարկային միջոցներով։ Խոսքը հսկայական գումարի մասին է, որը համայնքը չունի, և կառավարությունը պետք է օգնի այդ հարցում»,- ասաց քաղաքապետը։
Մարությանը նաև նշեց, որ քաղաքապետարանի վրա մեծ պատասխանատվություն է դրված։
«Տրանսպորտային համակարգը պետք է ճիշտ աշխատի, խոսքը միայն ավտոբուսներ գնելու մասին չէ։ Դրանց գնումը է տվյալ գործընթացի ամենահեշտ քայն է։ Դժվարությունը հենց ցանցի կառուցումն է. տոմսերի վաճառք, գնային քաղաքականություն։ Շատ հարցեր կան, որոնք ձգձգում են գործընթացը»,- ասաց քաղաքապետը։
Քաղաքապետարանի մամուլի քարտուղար Հակոբ Կարապետյանն իր հերթին իր Facebook-յան էջում հայտնել է, որ նոր տրանսպորտային համակարգի ներգրավման համար անհրաժեշտ է 850 ավտոբուս, որոնց առաջին խմբաքանակը Երևանում կլինի 2020 թ.–ի ընթացքում։
«Նախնական տեղեկատվությամբ, 2020-ի փետրվարին Երևանի նոր տրանսպորտային համակարգի ավտոբուսների համար մրցույթ կհայտարարվի»,-նշել է նա։
Ավելի վաղ նշվել էր, որ հաջորդ տարի դադարեցվելու է մոտ 400 միկրոավտոբուսների շահագործումը՝ դրանց ծառայության ժամկետի (15 տարի) լրանալու պատճառով։ Ընդ որում ամբողջ քաղաքը սպասարկում է 900 միկրոավտոբուս։-0-
