Ավանդական և էլեկտրոնային ԶԼՄ-ների աշխատանքի առանձնահատկությունն առաջիկա տարիներին լուրջ վերափոխման կենթարկվի և կգնա սոցիալական ցանցերի հետ միավորման ճանապարհով, քանի որ արդեն այսօր տեղեկատվության ստեղծումն ու տարածումը դադարել է լինել միայն ԶԼՄ-ների առավելությունը:
Ինչպես կարծում է ArmRADIO ռադիոկայանի տնօրեն, Հայաստանի PR մասնագետների ասոցիացիայի փոխնախագահ Արման Սաղաթելյանը, ով մասնակցել է Աստանայում կայացում Եվրոպական և ասիական մեդիաների վեցերորդ ֆորումին (ԵԱՄՖ), Հայաստանը չի կարող շրջանցել այդ գործընթացը: Նրա կանխատեսումների համաձայն՝ կգոյատևեն միայն այն ԶԼՄ-ները, որոնք արդեն այսօր հասկանում են դա և սոցիալական ցանցերի դեմ անիմաստ պայքարի փոխարեն փորձում են համագործակցել նրանց հետ:
Եվրոպական և ասիական մեդիաների վեցերորդ ֆորումը (ԵԱՄՖ), որի անփոփոխ կազմակերպիչը «ՌԻԱ Նովոստի» մեդիահոլդինգն է, անցկացվեց նոյեմբերի 20-22-ը Աստանայում (Ղազախստան)՝ «Անկախության 20 տարիները՝ ԶԼՄ-ներն ու հանրությունը» կարգախոսով:
Ֆորումին մասնակցել են ԱՊՀ, Բալթյան երկրների և Վրաստանի ԶԼՄ-ների ավելի քան 250 ներկայացուցիչներ, այդ թվում՝ ԶԼՄ-ների ղեկավարներ և հետխորհրդային տարածքի մեդիաարդյունաբերության ականավոր թոփ մենեջերներ, բլոգերներ, փորձագետներ, վերլուծաբաններ:
Էլեկտրոնային ԶԼՄ-ների պետական կառավարումը
Այսօր մենք սոցիալական ցանցերի բումի ականատեսն ենք, սակայն ինչպես կարծում է Հայ-ռուսական սլավոնական համալսարանի Գործնական լրագրության ամբիոնի վարիչ, «Իրավունք» թերթի Խմբագրական խորհրդի նախագահ Հայկ Բաբուխանյանը, պետությունը պարտավոր է կարգավորել տարբեր սոցիալական ցանցերի գործունեությունը:
Նրա կարծիքով՝ այսօր ինտերնետի, մասնավորապես սոցիալական ցանցերի պետական կառավարումը Հայաստանումը չի իրականացվում պատշաճ մակարդակով, և այդ ոլորտը գտնվում է ամենաթողության պայմաններում:
Ինչպես նշել է Բաբուխանյանը, արաբական աշխարհում վերջերս տեղի ունեցած իրադարձությունները ցույց տվեցին, որ սոցիալական ցանցերը կարող են լուրջ զենք դառնալ պետության դեմ, «իսկ եթե կա զենք, ապա հարկավոր է այդ զենքից պաշտպանվելու համակարգ ստեղծել»:
Հայաստանի PR մասնագետների ասոցիացիայի նախագահ Արման Սաղաթելյանն իր հերթին նշում է, որ պետական կառավարումը չպետք է վերաբերի միայն առանձին ԶԼՄ-ներին, և եթե այսօր պետությունը կարգավորում է տպագիր ԶԼՄ-ների և հեռուստաընկերությունների գործունեությունը, ապա դա պետք է տարածվի նաև էլեկտրոնային ԶԼՄ-ների վրա:
«Մեզ մոտ ամեն ինչ այնքան էլ վատ չէ»
Ինչպես նշեցին ԵԱՄՖ-ի հայ մասնակիցները, Հայաստանը ԶԼՄ-ների աշխատանքի կանոնակարգման ազատականության մակարդակով անհամեմատ բարձր դիրքեր է զբաղեցնում, քան հետխորհրդային տարածքի բազմաթիվ երկրներ:
Այսպես, Արման Սաղաթելյանի կարծիքով՝ հայկական մեդիադաշտը և օրենսդիր, և պետկառավարման ու Ինտերնետ-օգտատերերի ակտիվության տեսանկյունից անհամեմատ ավելի առաջատար դիրքերում է, քան նախկին Միության շատ երկրներ
Փորձագետի խոսքերով՝ Հայաստանը ԶԼՄ-ների զարգացման առավել ճիշտ ուղին է ընտրել, և չնայած նախկին ԽՍՀՄ-ի բոլոր երկրները 20 տարի առաջ իրենց ճանապարհը սկսել են միևնույն մեկնարկային կետից, ամեն դեպքում այդ երկրներում մեդիա-դաշտը տարբեր կերպ է զարգացել:
Սաղաթելյանի խոսքով՝ այսօր կան երկրներ, որտեղ փակ են ամբողջ Ինտերնետ-հարթակներ, օրինակ, «Կենդանի ամսագիրը», իսկ թվային մեդիան ենթարկվում է խստագույն պետական կառավարման, ինչը չկա Հայաստանում:
Կովկասի ինստիտուտի տնօրեն Ալեքսանդր Իսկանդարյանն իր հերթին նշեց, որ այս կամ այն ոլորտում Հայաստանի ձեռքբերումների ճիշտ գնահատման համար անհրաժեշտ է ճիշտ համեմատություններ կատարել:
«Որոշ հանգամանքներից ելնելով՝ մենք սիրում ենք մեր երկիրը համեմատել Հոլանդիայի, Բելգիայի, Լյուքսեմբուրգի կամ Շվեյցարիայի հետ, հաճախ մոռանալով, որ Հայաստանը դուրս է եկել Խորհրդային Միությունից, և երկիրը պետք է գնահատել հենց այդ համատեքստում: Երբ մենք համեմատում ենք Հայաստանը ԽՍՀՄ-ից դուրս եկած այլ երկրների հետ, ապա, միանշանակ, նկատում ենք, որ ամեն ինչ մեզ մոտ այնքան էլ վատ չէ»,- ասաց Իսկանդարյանը:
Հաջորդ ԵԱՄՖ-ն
Եվրոպական և ասիական մեդիայի հաջորդ ֆորումի /ԵԱՄՖ/ անցկացման վայրը կորոշվի «Հարյուր կողմ» ինտերնետ պորտալում անցկացվելիք քվեարկության միջոցով:
«Հարյուր կողմը» ԱՊՀ, Բալթյան երկրների և Վրաստանի ԶԼՄ-ների ընդհանուր նախագիծն է, որը ստեղծվել է «ՌԻԱ Նովոստիի» կողմից: Ռեսուրսը հավաքում է հետխորհրդային տարածքի երկրների առաջատար ԶԼՄ-ների, այդ թվում նաև «ՌԻԱ Նովոստիի» Ադրբեջանի, Հայաստանի, Վրաստանի, Ղազախստանի և Մոլդովայի գործընկերների նորություններն ու հեղինակային նյութերը:
ԵԱՄՖ-ն առաջին անգամ անցկացվել է «ՌԻԱ Նովոստի» գործակալության կողմից 2006 թ.-ին: Միջոցառման նպատակն է համախմբել նախկին ԽՍՀՄ հանրապետությունների լրագրողական միությունները: Այսօր ԵԱՄՖ-ն բացառիկ հարթակ է, որը միակն է հետխորհրդային տարածքում: Այն թույլ է տալիս ԱՊՀ, Բալթյան երկրների և Վրաստանի ԶԼՄ-ների ներկայացուցիչներին քննարկել և կանխատեսել մեդիաոլորտի զարգացման գործընթացները, ինչպես նաև փորձ փոխանակել: --0—
