Համաներման նշանի ներքո` սրընթաց սցենարով սյուժե. Հայաստանի նախորդ շաբաթվա արդյունքները

Նախորդ շաբաթը Հայաստանում անցավ համաներման նշանի ներքո, որը հայտարարվել է իշխանությունների կողմից հանրապետության անկախության 20-ամյակի կապակցությամբ: Եվ առաջինը հայտնեցին մայիսի 27-ին ՀՀ ԱԺ նախկին պատգամավոր Սասուն Միքայելյանի ազատ արձակման մասին, որը պատիժ էր կրում 2008 թ.-ի մարտյան անկարգություններին մասնակցելու համար:

Նույն օրը գրեթե մեկ ժամվա տարբերությամբ ազատ արձակվեց նաև «Հայկական ժամանակ» ընդդիմադիր թերթի գլխավոր խմբագիր Նիկոլ Փաշինյանը:

Հարկավոր է նշել, որ դատապարյալների, այդ թվում նաև 2008 թ.-ի մարտյան ողբերգական իրադարձությունների համար պատիժ կրողների համաներման հարցը բուռն կերպով քննարկվում էր ողջ շաբաթվա ընթացքում: Համաներման մասին առաջարկն արվել էր ՀՀ նախագահ Սերժ Սարգսյանի կողմից և ուժի մեջ է մտել խորհրդարանում մայիսի 26-ին այդ հարցի կապակցությամբ տեղի ունեցած քվեարկությունից հետո:

Ինչպես հայկական ԶԼՄ-ներին տեղեկացրեց ՀՀ արդարադատության նախարարության Քրեակատարողական վարչության մամուլի քարտուղար Արսեն Բաբայանը, համաներման շրջանակներում այս պահին ազատ է արձակվել 82 դատապարտյալ:

Քրեակատարողական վարչության հասարակայնության հետ կապերի բաժինը պարբերաբար կիրազեկի հասարակությանը համաներումից օգտված այլ անձանց մասին:

Այս «թեժ» թեմային անդրադարձան ինչպես միջազգային կառույցներն, այնպես էլ հանրապետության քաղաքական գործիչները:

Համաներման փաստը ողջունել են ԵԽԽՎ-ն և «Հայաստանում եվրոպական շարժում» կազմակերպությունը: ԵԽԽՎ-ի տեղեկատվության մեջ, մասնավորապես, նշվում է, որ «այս անձանց ազատումը և 2008 թվականի մարտյան անկարգություններում զոհված 10 մարդու գործով քննության նոր փուլը կվերացնի քաղաքական մթնոլորտի բարելավման ճանապարհին առկա վերջին խոչընդոտը և իշխանություն-ընդդիմություն կառուցողական երկխոսության դուռ կբացի»:

Դաշնակցության խմբակցության անդամ Արծվիկ Մինասյանն իր հերթին ՀՀ նախագահի առաջարկած համաներումը համարել է թեև ուշացած, բայց ճիշտ որոշում:

Ընդդիմության հանրահավաք. Ազատ արձակվածների ելույթը

Կալանավորված և համաներման տակ ընկած ընդդիմադիրները՝ «Հայկական ժամանակ» թերթի գլխավոր խմբագիր Նիկոլ Փաշինյանը և նախկին պատգամավոր Սասուն Միքայելյանը, ելույթ կունենան մայիսի 31-ին կայանալիք Հայ Ազգային կոնգրեսի հանրահավաքին, ուրբաթ լրագրողներին հայտնեց ՀԱԿ մամուլի քարտուղար Արման Մուսինյանը:

Ըստ նրա՝ մայիսի 31-ի հանրահավաքին Փաշինյանի և Միքայելյանի ներկայության և ելույթի փաստը լուրջ խթան կդառնա նոր քաղաքական փոփոխությունների համար:

Միաժամանակ հայտնի քաղաքագետ, Կովկասի ինստիտուտի տնօրեն Ալեքսանդր Իսկանդարյանը կարծում է, որ հանրապետությունում ներքաղաքական պայքարի ակտիվացման տեսակետից մարտյան գործով կալանավորվածների ազատ արձակումը կարող է լրջորեն ազդել քաղաքական պայքարի վրա:

Դովիլ. երկինքը պետք է խաղաղ լինի

Եթե ներքաղաքական բանավեճերը հիմնականում ընթանում էին համաներման թեմայով, ապա հանրապետությանը վերաբերող արտաքին-քաղաքական զարգացումների հիմնական «մեխը» Դովիլում ԵԱՀԿ ՄԽ առաջնորդներ ՌԴ, ԱՄՆ և Ֆրանսիայի նախագահներ Դմիտրի Մեդվեդևի, Բարաք Օբամայի և Նիկոլա Սարկոզիի ընդունած հայտարարության շուրջ ընթացող քննարկումներն էին:

Հայտարարության մեջ, մասնավորապես, նշվում է, որ միայն բանակցությունների միջոցով հակամարտության կարգավորումը կարող է բերել խաղաղության, կայունության և հաշտեցման՝ հնարավորություններ բացելով տարածաշրջանային զարգացման և համագործակցության համար, իսկ հակամարտության գոտում ուժի կրկնակի կիրառումը կդատապարտվի միջազգային հանրության կողմից:

Այս հարցին հանրապետության քաղաքական գործիչները դրական արձագանքեցին:

Այսպես, ՀՀԿ խորհրդարանական խմբակցության ղեկավար Գալուս Սահակյանը նշեց, որ Հայաստանը միշտ պատրաստ է եղել խնդրի խաղաղ կարգավորմանը, և հայտարարությունը բավականին բարենպաստ է Հայաստանի համար:

ՀՀԿ-ի խորհրդարանական խմբակցության քարտուղար Էդուարդ Շարմազանովի խոսքերով՝ երեք նախագահների հայտարարությունը հիմնականում համահունչ է Հայաստանի դիրքորոշման հետ և Ադրբեջանին ուղղված հստակ ուղերձ է:

«Հայտարարության մեջ ընդգծվում է ուժի կիրառման անթույլատրելիությունը, ինչի մասին բազմիցս խոսել են հայկական երկու կողմերը՝ Հայաստանն ու Արցախը», - ասաց Շարմազանովը «Նովոստի-Արմենիա» գործակալությանը:

Նրա խոսքերով՝ երեք երկրների նախագահները նշել են, որ խաղաղ կարգավորումն այլընտրանք չունի:

ՀՀ փոխարտգործնախարար Շավարշ Քոչարյանն իր հերթին նշել է, որ հայկական կողմերը ՀՀ ԱԳ նախարարի և ԼՂՀ նախագահի մամուլի քարտուղարի շուրթերից հայտարարել են, որ ընդունում են փաստաթղթում տեղ գտած մոտեցումները:

Դաշնակցության խմբակցության անդամ Արծվիկ Մինասյանի կարծիքով՝ փաստաթղթում օգտագործվում է «կողմեր» տերմինը, ինչը թույլ է տալիս Հայաստանին բանակցային գործընթացում պահանջել Ղարաբաղի մասնակցությունն ու ԼՂՀ-ի ճանաչումը՝ որպես հակամարտող կողմ:

Քաղաքական գործիչների կարծիքով՝ Դովիլում ընդունված որոշումը «կկապի» չափազանց ագրեսիվ տրամադրված Ադրբեջանի «ձեռքերը» և կստիպի նրան մտածել որևէ ռազմատենչ հայտարարություն անելուց առաջ:-0-