Հանգիստը Հայաստանում. լավագույն դեղամիջոցը ձմեռային դեպրեսիայից
ԵՐԵՎԱՆ, 28 նոյեմբերի. /Նովոստի–Արմենիա/. Ձմռան գալուն հաշված օրեր են մնացել, և ամանորյա արձակուրդները ևս սարերի հետևում չեն։ Գրեթե բոլորն արդեն հիմա սկսում են մտածել այն մասին, թե ինչպես կարելի է ուրախ և արդյունավետ անցկացնել ամանորյա արձակուրդները։ «Նովոստի–Արմենիա» գործակալությունն առաջարկում է այլընտրանքային տարբերակ արտասահմանյան նորաոճ հանգստավայրերին և հրավիրում ճանապարհորդության աշխարհի հնագույն երկրներից մեկում` Հայաստանում։
Տարբերակ առաջին. լեռնադահուկային սպորտ
Ծաղկաձորը հանգստավայր է, որը գտնվում է Թեղենիս լեռնաշղթայի ստորոտում` գեղատեսիլ հովտում, մայրաքաղաք Երևանից 50 կմ հեռավորության վրա։ Ծաղկաձորը գրավում է լեռնադահուկային և այլ սպորտաձևերի սիրահարներին։ Ծաղկաձոր են այցելում ոչ միայն Հայաստանի բնակիչները, այլ նաև օտարերկրացի զբոսաշրջիկները, այդ թվում` Ռուսաստանից։
Դատեք ինքներդ. համաշխարհային գների համեմատ բավականին մրցունակ գներ, զարգացած ենթակառուցվածք, դեկտեմբերից մինչև ապրիլ տևող լեռնադահուկային սեզոն։ Դրան ավելացրեք ձմեռային միջին ջերմաստիճան` զրոյից ցածր հինգ աստիճանի սահմանում և տարվա ընթացքում 260–270 արևային օր։
Ծաղկաձորում գործում են մոտ 20 կմ երկարությամբ լեռնադահուկային մայրուղիներ, մի քանի ճոպանուղիներ, մեծ մարզական համալիր, լողավազաններ, մարզադաշտ, ձիանոց, շոգեբաղնիք և բազմաթիվ այլ մարզական շինություններ, ինչպես նաև բարեր, ռեստորաններ և սրճարաններ, որոնք առաջարկում են ինչպես ազգային, այնպես էլ եվրոպական խոհանոց։ Այս ամենի շնորհիվ Ծաղկաձորում կազմակերպված հանգիստը կդառնա անմոռանալի ինչպես փորձառու, այնպես էլ սկսնակ մարզիկների և պարզապես սիրողական սպորտով զբաղվող մարդկանց համար։
Տարբերակ երկրորդ. էքստրիմը շատ չի լինում
Աշխարհում մեծ թափ է առնում արկածային տուրիզմի ուղղություններից մեկը` զիփլայնը։ Ողջ աշխարհում սնկի պես աճում են արկածային կենտրոնները, որտեղ կարելի է ճոպանի վրա թռչել գլխապտույտ արագությամբ։ Վերջերս նման կենտրոն է բացվել նաև Հայաստանում` Տավուշի մարզում։
Զիփլայն ատրակցիոնի գլխավոր առավելությունն էքստրիմի և սուր զգացողությունների մթնոլորտն է։ Հարկավոր է նշել, որ զիփլայնն ի սկզբանե իրենց ներկայացրել է գրավիտացիոն սարք, որը բաղկացած է եղել մալուխներից և բլոկերից, այն նախատեսված է եղել ձորերի, գետերի, ինչպես նաև անանցանելի վայրերի վրայով մարդկանց և բեռների արագ տեղափոխման համար։
Տարբերակ երրորդ. շքեղ հանգիստ
Նրանց, ովքեր շատ են սիրում ամառն ու ափսոսում են, որ մարդիկ չեն կարող արջերի պես ձմռան քուն մտնել, առաջարկում ենք հանգստի շքեղ միջով` սպա, մերսում, լողավազան։ Նման ծառայությունների ամբողջական համալիր է գործում Ջերմուկում, որտեղ այդ ամենը կարելի է համատեղել բուժիչ ջրերով և հանքային ջրի լոգանքներով։
Մրցակցությունից դուրս են ձմեռային այն երեկոները, որոնք կարելի է անցկացնել բուխարու առաջ` ընթերցելով սիրված գրքերից մեկը։
Տարբերակ չորրորդ. լեռներից ավելի լավ կարող են լինել միայն Հայաստանի լեռները
Հայաստանը լեռների երկիր է։ Այնպես որ լեռնային երթուղիների և ալպինիզմի ոլորտում սեզոնային սահմանափակումներ Հայաստանում չկան։ Ինչ վերաբերում է լեռների գագաթներից բացվող գեղատեսիլ տեսարաններին, ապա դրա մասին անգամ չարժե խոսել, դա հարկավոր է տեսնել։ Հայաստանում ալպինիզմը հարուստ ավանդույթներ ունի։
Հայաստանում ամենահայտնի ալպինիստական երթուղիները Հատիս և Արայի լեռներն են, սակայն համապատասխան պատրաստվածության դեպքում շատ հետաքրքիր է բարձրանալ նաև Արագած լեռ ու անցնել Տաթևի երթուղիներով։
Սկսնակ ալպինիստները պետք է հիշեն, որ ձմռանը լեռ բարձրանալն ավելի դժվար է, քան ամռանը, և դա անհրաժեշտ է անել միայն խմբով, ինչպես նաև ուղեկցորդի օգնությամբ։
Տարբերակ հինգերորդ. Հայաստան` թանգարան բաց երկնքի տակ
Հայաստանն իրավամբ կարելի է համարել թանգարան բաց երկնքի տակ։ Անգամ ամենափոքր գյուղերը կարող են հպարտանալ հնագույն եկեղեցիներով և տաճարներով, որոնք ճարտարապետական գլուխգործոցներ են։
Համեմատաբար մեղմ ձմեռն ու տարվա ընթացքում արևային օրերի առատությունը թույլ են տալիս անգամ ձմռանը զմայլվել Հայաստանի ճարտարապետական գանձերով։ Հայաստանի գլխավոր և ամենահայտնի ճարտարապետական հուշարձաններից հարկավոր է առանձնացնել Գեղարդի վանքը, Նորավանքը, Խոր Վիրապն ու Սանահինը, Գառնիի տաճարը, Օձունի եկեղեցին, Տաթևի վանական համալիրը, Էրեբունի ամրոցը և, իհարկե, Մայր Աթոռ Սուրբ Էջմիածինը։–0–
