Ժենգյալով հաց, պիցցա և տոլմա․ ցանկացած ճաշակի վարպետության դասեր Yerevan Gastronomic Days–ի շրջանակում (ԾՐԱԳԻՐ)
ԵՐԵՎԱՆ, 6 հունիսի․/Նովոստի–Արմենիա/․ Հունիսի 7-9-ը Երևանում անցկացվող Yerevan Gastronomic-ի շրջանակում կկազմակերպվեն բազմաթիվ վարպետության դասեր, որոնք կհամապատասխանեն յուրաքանչյուրի ճաշակին։
Ժենգյալով հաց՝ արցախցիների անձնագիրը
Yerevan Gastronomic Days–ի ամենավառ միջոցառումներից մեկը խոստանում է դառնալ ժենգյալ հացի պատրաստման վարպետության դասը։
«Ժենգյալովյան հացը ավանդույթ է, արցախցու անձնագիրը, ուստի որոշեցինք պատրաստել այն։ Մեզ միացել է նաև արցախցի տատիկների երաժշտական խումբը՝ ապահովելու արցախյան ոգու առկայությունը»,- «Նովոստի–Արմենիա» գործակալությանը տված բացառիկ հարցազրույցում հայտարարեց «Արցախի համը» սոցիալական նախաձեռնության հիմնադիր Նելլի Պողոսյանը։
Նրա խոսքով, փորձ է արվելու ցույց տալ, թե ինչ կարող է ստացվել 22 տեսակի կանաչեղենի համադրումից, թե որքան բարակ կարելի է գրտնակել խմորը և որ ամենակարևորն է, թե ինչպես են իսկական արցախցիները պատրաստում ժենգյալ հացը՝ մեծ սեր դնելով դրա մեջ։
«Ամեն ինչ պետք է պատրաստել մեծ սիրով և ջանասիրությամբ, և պետք է չմոռանալ ավելացնել քոնը, ինչը ճաշատեսակին կհաղորդի նոր համ», - Պողոսյանը ներկայացրեց խոհարարական գլուխգործոցների գաղտնիքը։
Նա նշեց, որ նախաձեռնության համար մեծ պատիվ է մասնակցել Yerevan Gastronomic Days–ին և ներկայացնել արցախյան ավանդական ուտեստը։
«Մենք պատրաստվում ենք ըստ արժանվույն հանդես գալ այս մասշտաբային փառատոնին։ Ոգեշնչվում ենք մեր նախնիներից հասած բաղադրատոմսերից՝ պահպանելով դրանք և շարունակելով տարածել ամբողջ աշխարհում»,- եզրափակեց Պողոսյանը։
Վարպետության դասերը՝ որպես պատմություն և մշակույթ
Շեֆ խոհարար, Qatar International Food FESTIVAL–ի համահիմնադիր, «Մամիգ» ռեստորանի հիմնադիր Զարմիգ Հալլաջյանը «Նովոստի–Արմենիա» գործակալությանը տված բացառիկ հարցազրույցում նշեց, որ իր համար մեծ պատիվ և ուրախություն է Հայաստանում գաստրոնոմիկ շոու վարելը։
«Ավելի քան 40 երկիր այցելելուց հետո հայրենիք վերադառնալն ինձ հպարտությամբ և սպասումով է լցնում։ Սա բացառիկ հնարավորություն է՝ ցուցադրելու հայկական և լիբանանյան խոհանոցների միաձուլումը, մեր հայրենակիցների հետ կիսելու մեր հարուստ մշակութային ժառանգությունն ու նորարարական խոհարարական տեխնոլոգիաները։ Ես անհամբեր սպասում եմ տեղական համայնքի հետ շփվելու, մեր ավանդույթները տոնելու և Հայաստանի վառ գաստրոնոմիկ կյանքին նպաստելու հնարավորությանը», - ասաց Հալլաջյանը։
Նրա խոսքով, վարպետության դասերին պետք է ներկայացվեն տարբեր ազգերի ուտեստներ, ինչպես նաև պատմությունը և մշակույթը։
Հայտնի շեֆ խոհարարը հորդորեց սկսնակ խոհարարներին չվախենալ սխալվելուց, զարգանալ, քրտնաջան աշխատել և կենտրոնանալ սեփական կրքի և նպատակների վրա: Նա նաև խոստովանեց, որ ոգեշնչված է ուտեստներ ստեղծելու նոր մեթոդներով և արվեստով։
«QIFF-ը (Qatar International Food Festival) ստեղծվել է Qatar Tourism կազմակերպության կողմից: Ես շատ հպարտ եմ, որ թիմի մի մասն եմ: Ամեն տարի մենք հյուրընկալում ենք մասնագետների և հայտնի մարդկանց ամբողջ աշխարհից: Ես ներկայացնում եմ իմ վարպետության դասերը և հանդես եմ գալիս որպես հաղորդավար կառավարության կողմից կազմակերպված այս միջոցառմանը, որը նշանակալի ազդեցություն ունի տեղական և միջազգային հասարակության վրա: Սա յուրօրինակ իրադարձություն է Կատարի համար»,- պատմեց Հալլաջյանն աշխարհի ամենահայտնի food փառատոներից մեկի մասին, որին ինքն անմիջական մասնակցություն ունի։
Ինչ վերաբերում է նրա հիմնած ռեստորանին, ապա դրա հայեցակարգը միավորում է հայկական և լիբանանյան մշակույթները՝ ներկայացնելով ֆյուժն ճաշացանկ։
«Իմ առաքելությունը տարբերվում է՝ կախված հասարակությունից և երկրից: Պրոֆեսիոնալ առումով ես հարգում եմ յուրաքանչյուր երկրի յուրահատուկ բաղադրիչները, համն ու մշակույթը»,- ասաց Զարմիգը:
Վարպետության դասերի ժամանակացույցը
7 հունիսի
Առաջին բեմահարթակ
20:30 - 21:15
Արվեստագետ Արթուր Չեխի «Սնունդն արվեստի պատմության մեջ» վարպետության դաս (ռուսերեն)
21:45 - 22:30
Pizza making master class "The real taste of Naples" – Maestro Pizzaiolo Marco Leone (անգլերե)
8 հունիսի
Երկրորդ բեմահարթակ
20:30 - 21:15
«Դոլմամա» ռեստորանի՝ տոլմայի պատրաստման վարպետության դաս
9 հունիսի
Առաջին բեմահարթակ
16:30 - 17:15
«Արցախի համը» ժենգյալով հացի պատրաստման վարպետության դաս (հայերեն):
