ԵՐԵՎԱՆ, 30 օգոստոսի. /Նովոստի–Արմենիա/. Հունահռոմեական ոճի ըմբիշ Միհրան Հարությունյանը, ով կանխակալ մրցավարության պատճառով զրկվեց «ոսկուց» Ռիոյի Օլիմպիադայի ժամանակ, մեկնաբանել է շրջանառվող խոսակցություններն այն մասին, որ իր դեմ իրականացվում է նպատակաուղղված աշխատանք, այդ թվում` Ռուսաստանի ըմբշամարտի ֆեդերացիայի նախագահ Միխայիլ Մամիաշվիլու կողմից։
Օլիմպիադայի եզրափակչում, գրեթե բոլոր մասնագետների կարծիքով, հաղթանակը անարդարացիորեն շնորհվեց Հարությունյանի մրցակցին։ Սերբ Դավոր Շտեֆանեկի հետ գոտեմարտն ավարտվեց 1։1 հաշվով։ Մրցավարը երկրորդ մրցափուլում սերբին մեկ միավոր գրանցեց իբր Հարությունյանի պասիվության պատճառով։ Հայ մարզիկն ու նրա մարզիչները չհամաձայնեցին այդ որոշման հետ։ Այնուամենայնիվ, հաղթանակը գրանցվեց սերբի հաշվին։
Մի շարք ԶԼՄ-ներ հիշեցրեցին, որ Ըմբշամարտի միջազգային ֆեդերացիայի նախագահը սերբ Նենադ Լալովիչն է: Մարզական մեկնաբանների կարծիքով, մրցավարներն ուղղակի նվեր մատուցեցին Լալովիչին` «շնորհելով» ոսկե մեդալը նրա հայրենակցին:
Բացի այդ, հայկական ԶԼՄ-ներում տեղեկատվություն հայտնվեց այն մասին, որ հայ ըմբիշի առաջընթացը խոչընդոտում է Միխայիլ Մամիլաշվիլին, քանի որ նա Հարությունյանի հետ կոնֆլիկտ է ունեցել, երբ Հարությունյանը դեռ Ռուսաստանի հավաքականի անդամ էր:
«Այս ընթացքում մենք զուսպ ենք եղել, հանգիստ, ոչինչ չենք ասել: Մենք ունեինք բավականաչափ խիզախություն, ուժ և արժանապատվություն` ոչինչ չասելու համար: Այժմ այլևս չեմ ուզում բարի թվալ, քանի որ ամեն ինչ զզվեցրել է: Այլևս չեմ ամաչում ասել, որ նրանք «զզվեցրել» են իրենց խաղերով: Ուղղակի թույլ չեն տալիս առաջ շարժվել, անընդհատ խանգարում են», - ասել է Հարությունյանը հայկական «Կենտրոն» հեռուստաալիքին տված հարցազրույցում:
Միխայիլ Մամիաշվիլի. եթե ես խանգարեի Միհրանին, ապա նա նույնիսկ օլիմպիական խաղերին չէր մասնակցի>>
«Շատերն ասում են` նա սերբ էր (Հարությունյանի մրցակիցը եզչափակիչում), ուրիշ ձև ինչպե՞ս էիր ցանկանում, որ լիներ: Շատերը ասում են` դու հեռացել ես Ռուսաստանից, և Մամիաշվիլին դրան հավանություն չի տալիս: Եվ ընդհանրապես, շատերը չեն ուզում, որ ես հաղթեմ, քանի որ հեռացել եմ Ռուսաստանից և հանդես եմ գալիս Հայաստանի դրոշի ներքո: Ինչպե՞ս կարող եմ հաղթել, ի՞նչ են նրանք ասելու մարդկանց կամ հենց երկրի նախագահին: Ինչու էր այս տղան այստեղ, ապա հեռացավ: Շատ բան են խոսում, բայց ես մի բան գիտեմ` նրանք բոլորն արդեն զզվեցրել են», - ընդգծել է հայ մարզիկը:
Նրա խոսքով, նա չգիտի` ինչպես պայքարել դրա դեմ: «Հասկանում եք, ես ավելի շատ պայքարում եմ ոչ թե հակառակորդներիս, այլ մրցավարների դեմ: Իմ առջև աշխարհի չեմպիոններ են: Հնարավոր չէ նրանց ուղղակի վերցնել և պատռել, դա շատ հազվադեպ է լինում։ Եթե նրան (սերբ ըմբիշին) պարտեր նստեցնեին, գոտեմարտը մեր օգտին կավարտվեր», - ասել է Հարությունյանը: -0-
