Մադրիդի «Ռեալում» լուրջ փոփոխություն է տեղի ունեցել

ԵՐԵՎԱՆ, 5 հունվարի./Նովոստի–Արմենիա/. «Ռեալ» ակումբի նախագահ Ֆլորենտինո Պերեսը հատուկ ասուլիսի ժամանակ հայտարարել է ակումբի գլխավոր մարզիչ Ռաֆայել Բենիտեսի հրաժարականի մասին։

Մադրիդի «Ռեալի» գլխավոր մարզչի պաշտոնը կզբաղեցնի Զինեդին Զիդանը, ով ավելի վաղ մարզում էր մադրիդցիների երկրորդ կազմը։

«Ակումբի ղեկավարությունը դժվարին որոշում է ընդունել, այն հատկապես բարդ էր ինձ համար։ Բենիտեսը պրոֆեսիոնալ է և հիանալի անձնավորություն։ Նոր գլխավոր մարզիչ է նշանակվել Զիդանը։ Եվ ես հպարտությամբ կարող եմ ասել, որ նրա համար գոյություն չունի «անհնարին» բառը», – նշել է Պերեսը, հաղորդում է championat.com–ը։

Բենիտեսը գլխավորել է «Ռեալը» նախորդ տարվա հունիսին։ Մամուլում միանգամից սկսեցին խոսակցություններ շրջանառվել ֆուտբոլիստների և Բենիտեսի միջև տեղի ունեցած կոնֆլիկտի մասին, սակայն ակումբում այդ լուրերը հերքեցին։

Բենիտեսի հրաժարականի հիմնական պատճառը լուրջ մրցակիցների հետ խաղերում թիմի վատ արդյունքներն էին։ Մադրիդցիները պարտվել են «Սևիլյային», «Բարսելոնային» և  «Վիլյառեալին», ինչպես նաև ոչ–ոքի են խաղացել «Ատլետիկոյի» և «Վալենսիայի» հետ։–0–