ԵՐԵՎԱՆ, 15 փետրվարի. /Նովոստի–Արմենիա/. Մի խումբ գիտնականներ` ֆուտուրոլոգներ, ճարտարապետներ և ուրբանիստներ, ներկայացրել են մարդկային քաղաքակրթության զարգացման իրենց նկարագիրը SmartThings Future Living Report զեկույցում, գրում է
moya-planeta.ru–ն` հղում անելով Independent–ին։
Գիտնականների կարծիքով, 2116 թվականին մարդկությունը կստեղծի ստորջրյա «պղպջակներում» տեղակայված քաղաքներ։ Բացի այդ, մակերևույթին կկառուցվեն հսկայական երկնաքերեր, որոնցից յուրաքանչյուրը նույնպես կարող է առանձին քաղաք դառնալ։
Ինչպես կարծում են զեկույցի հեղինակները, տրանսպորտի հիմնական տեսակներն անձնական անօդաչուները կլինեն։ Դրանց օգնությամբ հնարավոր կլինի տեղափոխել ամբողջ բնակավայրեր, օրինակ, եթե դուք ցանկանաք գնալ արձակուրդ, ապա դա հնարավոր կլինի անել առանց տանից դուրս գալու։
Գիտնականները նաև կարծում են, որ 3D-տպագրության հետագա զարգացումը թույլ կտա ստեղծել ինչպես տան կահույք, ինչպես նաև տներ։ Ծավալային տպագրությունը կթեթևացնի նաև կերակուրի պատրաստումը` հնարավոր կլինի բեռնել աշխարհի լավագույն խոհարարների առաջարկած կերակրատեսակները և դրանք արդեն մի քանի րոպեից պատրաստի վիճակում ստանալ։
Աշխարհը 2025 թվականին. ինը տարի հետո...>>
Հարյուր տարի անց մարդիկ կարիք չեն ունենա նորոգում կատարել բնակարանում` հնարավոր կլինի ընդամենը փոխել պատերը ծածկող էկրանների պատկերները։
Մինչև 2116 թվականը մարդկությունն առաջ կգնա երկնային ամենամոտ մարմինների` Լուսնի և Մարսի գաղութացման հարցում։
Կանխատեսման որոշ կետեր բավականին ֆանտաստիկ են թվում, սակայն իրականում վերոնշյալի իրագործման համար անհրաժեշտ տեխնոլոգիաների մեծ մասը մարդն արդեն յուրացրել է, և պատճառ չկա ենթադրելու, թե առաջընթացը դրանով կսահմանափակվի։
20–րդ դարասկզբի մարդու համար ժամանակակից աշխարհը նույնպես աներևակայելի ֆանտաստիկ կթվար, թեև, պետք է նշել, որ անցյալի գիտական ֆանտաստիկայի դասականներից ոչ ոք չէր կարող կանխատեսել, թե ինչպիսին այն կլինի։ -0-