ԵՐԵՎԱՆ, 31 մարտի. /Նովոստի-Արմենիա/. Vibrant Vegan Co. բրիտանական ընկերությունը ստեղծել է համի պետի թափուր աշխատատեղ, և ահա թե ինչ է նրանից պահանջվում: Աշխատակիցը պարտավորվում է ճանապարհորդել աշխարհով (Հնդկաստան, Չինաստան, Ճապոնիա և այլն)` մինչև չորս ամիս անցկացնելով արտերկրում: Այնտեղ նա պետք է համտեսի անծանոթ կերակրատեսակներ: Դրա նպատակն է` գտնել նոր և հաջող համադրություն, որն ընկերությունը կկարողանա նաև օգտագործել արտադրության մեջ:
Մասնագետը շաբաթական կաշխատի 35 ժամ, իսկ հաջող գտածոյի դեպքում կպարտավորվի բաղադրիչներ մատակարարել Անգլիա: Իհարկե, բոլոր ծախսերը կփոխհատուցվեն, իսկ արձակուրդը կտևի սահմանված կարգով` 28 օր: Մեկ տարվա ընթացքում աշխատողը կստանա 66 հազար դոլար, գրում է
life.ru-ն` հղում անելով Insider-ին:
Բայց, ցավոք, ընկերությունը հատուկ պահանջներ է ներկայացնում հայտատուին: Նախևառաջ, նա պետք է առնվազն երեք տարի աշխատած լինի սննդի ոլորտում կամ շեֆ խոհարար լինի: Նա, թեև պարտադիր չէ, որ բուսակեր լինի, բայց պետք է պատրաստ լինի, որ բոլոր բաղադրիչներն օրգանիկ ծագում ունենան: -0-