Երեք ըմպելիք, որոնք «այրում են» մարմնի ճարպը

ԵՐԵՎԱՆ, 1 հունվարի. /Նովոստի–Արմենիա/. Ավելորդ քաշից ազատվելու համար ոմանք նախընտրում են հետևել երկարատև դիետաների, ոմանք` այցելել մարզասրահ։ Սակայն, ինչպես խորհուրդ են տալիս Դիետոլոգների եվրոպական ասոցիացիայի փորձագետները, ամեն դեպքում, հարկավոր է օգտագործել ճարպն «այրող» մթերքներ, առաջին հերթին` հյութեր, գրում է «Կոմսոմոլսկայա պրավդան»։

1. Կանաչ թեյ

Կան բազմաթիվ հաստատված հետազոտություններ այն մասին, որ կանաչ թեյն ունի իսկապես հրաշագործ հատկություններ։ Այն արագացնում է նյութափոխականությունն ու օգնում պայքարել ավելորդ քաշի դեմ։ Կանաչ թեյն ունի հակականցերոգեն հատկություն և կանխարգելում է սրտային հիվանդությունները։ Մերիլենդի համալսարանի Բժշկական կենտրոնի փորձագետները կանաչ թեյում հայտնաբերել են նյութ` էպիգալլոկատեխին գալլատ, որն իրականում ունի հակաքաղցկեղային հատկություն։ Այն ազդում է ուռուցքի աճի վրա որոշակի մոլեկուլների վրա ներգործելու շնորհիվ, որոնք արգելակում են չարորակ բջիջների բազմացումը։ Գիտնականները վերլուծել են ուռուցքաբանության ոլորտի տվյալներն այն երկրներում, որտեղ մարդիկ ավանդաբար օգտագործում են մեծ քանակությամբ կանաչ թեյ։ Ճապոնիայում և Թայվանում, եվրոպական երկրների համեմատ, թոքերի քաղցկեղի հիվանդացության տոկոսը 15–20 տոկոսով ավելի ցածր է անգամ ծխող մարդկանց շրջանում։

Գիտնականններն ապացուցել են, որ կանաչ թեյի էպիգալկատեխիններն օգնում են նվազեցնել շաքարային դիաբետի զարգացման ռիսկը, պակասեցնել ավելորդ քաշը, երկարացնել մաշկի երիտասարդ տեսքն ու ամրապնդել իմունիտետը։ Թեյը պարունակում է մեծ թվով կոֆեին, որը 15 տոկոսով արագացնում է նյութափոխանակության գործընթացը։ Կանաչ թեյը հարկավոր է խմել օրվա ընթացքում։ Երեկոյան խմած կանաչ թեյը կարող է հանգեցնել քնի խանգարման և նյարդային գրգռվածության։ Օրվա ընթացքում պետք է խմել 3–4 բաժակ կանաչ թեյ։

Թարմ եփած կանաչ թեյի 100 գրամի կալորիականությունը 3–5 կիլոկալորիա է։

2. Թուրինջի հյութ

Հյութի կալորիականությունը ցածր է, վիտամինների քանակությունը` բարձր, հագեցածության զգացումը պահպանվում է երկար ժամանակ։ Ցիտրուսային մրգերը շատ լավ «այրում են» ճարպը, օրգանիզմն ապահովում են մեծ քանակությամբ С վիտամինով և էներգիա են հաղորդում։ Գրեյպֆրուտի հյութն ունի նաև միզամուղ հատկություն, ինչն օգնում է նվազեցնել զարկերակային ճնշումը։ Հիպերտոնիայի դեպքում խորհուրդ է տրվում ուտելուց առաջ օգտագործել ¼ բաժակ գրեյպֆրուտի հյութ։ Գրեյպֆրուտը նաև պարունակում է բրոմելին տեսակի նյութ, որն ուժեղացնում է լիպիդային փոխանակումը, այսինքն` օգնում է «այրել» ճարպը։

Սակայն ավելի լատ է ուտել միայն գրեյպֆրուտի միջուկը` հեռացնելով մասնիկների միջև գտնվող «միջնապատը», որը պարունակում է քայքայող նյութեր, որոնք կարող են բացասաբար ազդել ստամոքսի վրա։ Անհրաժեշտ է ամեն օր խմել 200–250 գրամ գրեյպֆրուտի հյութ կամ ուտել մեկ գրեյպֆրուտ։

100 գրամ գրեյպֆրուտի հյութի կալորիականությունը 33–36 կիլոկալորիա է։

3. Կոկոսի հյութ

Բուսական յուղերն օգտակար են և պարտադիր մսից հրաժարվելու դեպքում։ Այդ պատճառով կոկոսի հյութը, որը բուսական յուղերի հարուստ աղբյուր է, կարող է դառնալ լիանալի որոշում, եթե դուք հետևում եք դիետայի և օգտագործում ենք քիչ քանակությամբ մսեղեն։ Կոկոսի հյութը նաև համեղ աղանդեր է, որով կարելի է փոխարինել վնասակար քաղցրավենիքները։ Սակայն հիշեք, որ օգտակար է միայն թարմ հյութը, տարատեսակ էքստրակտներն ու փոխարինող նյութերն ավելի շատ վնաս կհասցնեն։ Անհրաժեշտ է օրվա ընթացքում օգտագործել է մինչև 100 գրամ կոկոսի հյութ։

100 գրամ կոկոսի հյութի կալորիականությունը 152 կիլոկալորիա է։ –0–