Հայտնի է անքնությունից ազատվելու պարզ եղանակը

ԵՐԵՎԱՆ, 30 հոկտեմբերի. /Նովոստի-Արմենիա/. Լինքոլնի և Լոնդոնի համալսարանի գիտնականների խումբը հայտնաբերել է, որ երաժշտություն լսելը բարերար ազդեցություն է ունենում քնի վրա՝ օգնելով թուլանալ և անցնել հանգիստ դանդաղ քնի փուլ և դրան հետևող արագ REM –քնի փուլ, որն արդյունավետ վերականգնում է ապահովում, գրում է vokrugsveta.ru կայքը:

Գիտափորձին մասնակցած 651 անդամները երկու շաբաթ 45 րոպեի ընթացքում քնելուց առաջ երաժշտություն են լսել: Կամավորներն ինքնուրույն են ընտրել երաժշտական կոմպոզիցիաները: Ամենանախընտրելիները Բախի և Մոցարտի, ինչպես նաև ժամանակակից երաժիշտների՝ Էդ Շիրանի, Բրայան Ինոյի և Coldplay խմբի կատարումներն էին: Ընդհանուր առմամբ, մարդիկ լսել են 14 տարբեր ժանրերի պատկանող 545 կոմպոզիտորների ստեղծագործություններ:



Գիտնականների դիտարկումներով, երաժշտությունն օգնել է գիտափորձի մասնակիցներին շեղվել արտաքին և ներքին գրգռիչներից, օրինակ, ճանապարհի կամ ականջների աղմուկից, ինչպես նաև անվտանգության զգացում է հաղորդել:

Գիտնականները պարզել են քնի պակասի հետևանքները>>

Հետազոտողները պարզել են, որ քնի համար լավագույն երաժշտությունն այն է, որը մարդն ինքնուրույն է ընտրել: Այնուամենայնիվ, նրանք մտադիր են շարունակել հետազոտությունները և ընդհանուր օրինաչափություններ գտնել քնից առաջ նվագարկվող մեղեդիներում, որոնք օգնում են թուլանալ և նպաստում են խորը և ամուր քնին:
Մասնագետները հույս ունեն ապագայում արդյունավետ ցուցումներ մշակել քնից առաջ լավագույն «քնեցնող» մեղեդիներ գտնելու ուղղությամբ:

Հայտնի է, որ լավ քունն անհրաժեշտ է ֆիզիկական և հոգեկան բարեկեցության համար: Սակայն քնի խանգարումները բավականին տարածված խնդիր է՝ մեծահասակների մոտ 30 տոկոսը բախվել է քրոնիկ անքնությանը: Այդ ցուցանիշն ավելի մեծ է տարեց մարդկանց, ինչպես նաև հաճախակի սթրեսի հակված մարդկանց շրջանում: Անքնությունը կարող է հիշողության անկման, տրամադրության փոփոխությունների, տագնապային խանգարումների, ինչպես նաև ճարպակալման և թուլամտության պատճառ լինել: -0-