Հայ դիմորդների ավելի քան 10 տոկոսը կտրվել է հայոց լեզվի ՄՊՔ-ից

Հայկական դպրոցների շրջանավարտների ավելի քան 10 տոկոսը չեն կարողացել հաղթահարել հայոց լեզվի միասնական պետական քննության 8-բալանոց շեմը, երեքշաբթի լրագրողներին հայտնեց Գնահատման և թեստավորման կենտրոնի (ԳԹԿ) տնօրեն Գուրգեն Խաչատրյանը։

«Ամենաբարձր բալ՝ 20 են ստացել ընդամենը երկու հոգի»,- նշեց ԳԹԿ տնօրենը՝ հավելելով, որ պաշտոնական արդյունքները կհայտարարվեն չորեքշաբթի։

Ըստ նրա՝ ընդհանուր առմամբ, բալերը ցածր են, ինչը չի արտացոլվի մրցույթի ընդհանուր պատկերի վրա։

«Հայոց լեզվի մասնագետները դեռևս նախորդ տարվա սեպտեմբերից անցել են թեստերի կազմմանը։ Ես չէի ասի, թե նախորդ տարվա համեմատ դրանք ավելի բարդ են»,- ասաց ԳԹԿ տնօրենը։

ՄՊՔ արդյունքներով, լավագույն արդյունքներն արձանագրվել են ընդհանուր պատմությունից՝ շրջանավարտների 13,31 տոկոսը ստացել են 17.5-ից մինչև 20 բալ, 36.59 տոկոսը՝ 13.5-ից 17.25, 42.62 տոկոսը՝  7.5-ց մինչև 13.25 բալ, միաժամանակ կտրվել է շրջանավարտների 7,48 տոկոսը։

Խոսելով մյուս քննությունների արդյունքների մասին՝ Խաչատրյանն ասաց, որ կենսաբանությունից ամենաբարձր բալեր են ստացել շրջանավարտների 4,8 տոկոսն, ընդ որում կտրվել է 23,6 տոկոսը, իսկ աշխարհագրությունից բարձր բալեր են հավաքել 4,47 տոկոսը, կտրվել՝ 16,9 տոկոսը։

 «Կենսաբանության միջին միավորը հավասար է 10,8-ի։ Ընդհանուր պատմության միջին միավորը 12,9-ն է, աշխարհագրության՝ 11,3 բալ»։

Հայաստանում ՄՊՔ հիմնական փուլը 2010 թվականին կշարունակվի մինչև հունիսի 23-ը։ ՄՊՔ-ին կմասնակցի 17 հազար դիմորդ Հայաստանից և Լեռնային Ղարաբաղից։

ՄՊՔ-ներ կանցկացվեն 10 առարկաներից՝ հայոց լեզու և գրականություն, կենսաբանություն, ընդհանուր պատմություն, աշխարհագրություն, ֆիզիկա, մաթեմատիկա, հայոց պատմություն, քիմիա, ռուսաց լեզու և օտար լեզու (անգլերեն, ֆրանսերեն, գերմաներեն, իսպաներեն, իտալերեն կամ պարսկերեն)։ -0-