Հայաստանի մասին վավերագրական ֆիլմ կցուցադրվի լեհական հեռուստատեսությամբ
ԵՐԵՎԱՆ, 9 նոյեմբերի. /Նովոստի-Արմենիա/. Հայաստանի մասին վավերագրական ֆիլմ կցուցադրվի լեհական հեռուստատեսությամբ, երկուշաբթի «Նովոստի» միջազգային մամուլի կենտրոնում լրագրողներին հայտնեց Հայաստանի էկոնոմիկայի նախարարության զբոսաշրջության և տարածքային տնտեսական զարգացման վարչության պետ Մեխակ Ապրեսյանը։
«Լեհաստանի Հանրային հեռուստաընկերության ներկայացուցիչներն արդեն նկարահանել են Հայաստանում անհրաժեշտ նյութը, որը մինչև տարեվերջ կցուցադրվի լեհական հեռուստատեսությամբ «Մակլովիչի ճանապարհորդությունը» ծրագրի շրջանակներում»,- ասաց Ապրեսյանը։
Միաժամանակ նա նշեց, որ Հայաստանի մասին «Հայաստան՝ Նոյի երկիր» վերնագրով մեկ այլ վավերագրական ֆիլմ արդեն հեռարձակվում է օտարերկրյա հեռուստաալիքներով, այդ թվում՝ Իսպանիայում և Սկանդինավյան երկրներում։
Ըստ նրա՝ բանակցություններ են տարվում նաև ֆիլմը Discovery ալիքով և իտալական հեռուստատեսության եթերում ցուցադրելու ուղղությամբ։
«Հայաստան՝ Նոյի երկիր» վավերագրական ֆիլմը ստեղծվել է իսպանական «Տրանսգլոբ» և «Բազզբիզնես» ընկերությունների կողմից Հայաստանի էկոնոմիկայի նախարարության աջակցությամբ։ -0-