Դելիի գլխավոր նախարարը տպավորված է անկախացումից հետո քաղաքական, տնտեսական եւ այլ ասպարեզներում Հայաստանի ունեցած հաջողություններով

ԵՐԵՎԱՆ, 6 սեպտեմբերի./Նովոստի-Արմենիա/. ՀՀ վարչապետ Սերժ Սարգսյանը հիմգշաբթի ընդունել է Երեւանի քաղաքապետի հրավերով պաշտոնական այցով  Հայաստան ժամանած Դելիի գլխավոր նախարար տիկին Շեյլա Դիքշիթին, այս մասին «Նովոստի-Արմենիային» հայտնեցին ՀՀ կառավարության տեղեկատվության և հասարակայնության հետ կապերի վարչությունից:

«Վարչապետը գոհունակություն  է հայտնել Հայաստանի եւ Հնդկաստանի միջեւ համագործակցության  զարգացումից, ինչի վկայությունն են, ըստ նրա, վերջին տարիներին հաճախակի դարձած  բարձր մակարդակի փոխայցելությունները, այդ թվում նաեւ Դելիի գլխավոր նախարարի առաջին պաշտոնական այցը մեր երկիր»,-ասված է հաղորդագրությունում:

Ստացված տեղեկատվության համաձայն՝  տիկին Դիքշիթը նշել է, որ տպավորված է անկախացումից  հետո քաղաքական, տնտեսական եւ այլ ասպարեզներում Հայաստանի ունեցած հաջողություններով։

Դելիի գլխավոր նախարարը հայտնել է, որ Հնդկաստանը պատրաստակամ է աջակցել   Հայաստանին  հետագա առաջընթացի հարցերում` սերտացնելով համագործակցությունը գյուղատնտեսության, առողջապահության, մշակույթի  եւ այլ բնագավառներում:

Ըստ հաղորդագրության՝ վարչապետը եւս կարևորել է երկու երկրների միջեւ հատկապես տնտեսական կապերի  խթանումը, ապրանքաշրջանառության, ներդրումների ծավալների ավելացումը։

 Նա  գոհունակություն է հայտնել Հայաստանի գործարանների վերագործարկման նկատմամբ հնդիկ գործարարների հետաքրքրվածության կապակցությամբ:

«Վարչապետը նշել է, որ ի լրումն վերոնշյալ ոլորտների,  մեր երկիրը շահագրգռված է զարգացնելու եւ խորացնելու  համագործակցությունը հատկապես տեղեկատվական տեխնոլոգիաների ոլորտում, որտեղ  Հնդկաստանի  հաջողություններն ակնառու են»,-տեղեկացրեցին հասարակայնության հետ վարչությունից:

Կրթության ոլորտում փոխգործակցության մեջ երկուստեք կարեւորվել են, մասնավորապես, ուսանողների փոխանակման, պետական մակարդակով միմյանց  դիպլոմների փոխադարձ ճանաչման հարցերը: --0--