ԵՐԵՎԱՆ, 22 հուլիսի./Նովոստի-Արմենիա/. Թուրքիայի ԱԳ նախարար Մևլյութ Չավուշօղլուն TRT Haber թուրքական հեռուստաընկերությանը տված հարցազրույցում հայտարարել է, որ Անկարան Երևանից հայտարարություններից զատ հստակ քայլեր է ակնկալում երկկողմ հարաբերությունների կարգավորման հարցում՝ հայկական կողմին մեղադրելով գործընթացի ձգձգման համար և երկու հստակ նախապայման առաջ քաշելով։ Երկուսն էլ կապված են հայ-ադրբեջանական հարաբերությունների հետ։
Ինչպես հաղորդում է
«Ազատություն» ռ/կ-ն, Չավուշօղլուն հայտարարել է, թե Հայաստանը պետք է քայլեր ձեռնարկի այսպես կոչված`«Զանգեզուրի միջանցքի» բացման և Ադրբեջանի հետ խաղաղության պայմանագրի հարցում:
«Ադրբեջանը և մենք անկեղծ ենք: Թե ինչքանով է անկեղծ Հայաստանը, ուզում ենք գործնականում տեսնել: Մինչ այժմ ազդակներ կան, հայտարարություններ կան: Ճիշտ է, ճնշում էլ կա: Դրսից սփյուռքի ճնշումը, ներսից էլ մոլեռանդ խմբերի: Սակայն Հայաստանի կողմից դեռ հստակ քայլեր չենք տեսնում Զանգեզուրի և այլ ծրագրերի հարցում կամ խաղաղության պայմանագրի: Այսինքն` Հայաստանի ղեկավարությունը` Փաշինյանի գլխավորությամբ, խաղաղության համար պետք է դրական քայլեր անի: Միայն խոսքերը բավարար չեն», - ասել է նա:
Ինչպես հաղորդում է
tert.am-ը, Թուրքիայի ԱԳ նախարարը հայտարարել է. «Մենք Հայաստանի հետ երկկողմ ձևաչափով գործընթաց ենք սկսել, սակայն պետք չէ մոռանալ, որ այն իրականում եռակողմ է»։
«Մենք ամեն մի քայլ Ադրբեջանի հետ ենք համապատասխանեցնում՝ կուզի Հայաստանը, թե ոչ, իրականությունը դա է: Մենք մի ժողովուրդ, երկու պետություն ենք», - ասել է Չավուշօղլուն:
Անդրադառնալով Թուրքիայի նախագահ Ռեջեփ Թայիփ Էրդողանի ու Հայաստանի վարչապետ Նիկոլ Փաշինյանի միջև հուլիսի 11-ին կայացած առաջին հեռախոսազրույցին՝ Չավուշօղլուն նշել է, որ Էրդողանը Փաշինյանին ներկայացրել է իր տեսակետները:
Թուրք դիվանագետը հայտնել է, որ Թուրքիան ու Ադրբեջանը խաղաղություն են ցանկանում տարածաշրջանում, ինչի մասին և հրապարակավ հայտարարարել են։
«Նովոստի-Արմենիա» գործակալությունը հայց է ուղարկել ՀՀ ԱԳՆ՝ խնդրելով մեկնաբանել Չավուշօղլուի հայտարարությունները:-0-
