«Հազարամյակի մարտահրավերներ» կորպորացիայի կողմից ճանապարհաշինության ծրագրի ֆինանսավորման դադարեցումը միտված չէ վիրավորելու հայ ժողովրդին
Հազարամյակի մարտահրավեր կորպորացիայի (ՀՄԿ) տնօրենների խորհրդի որոշումը՝ չշարունակել ճանապարհների կառուցման ու վերականգնման ծրագրի ֆինանսավորումը, շարունակությունն է 2008թ-ի նախագահական ընտրություններից հետո կայացված որոշման: 2008 թ-ից ի վեր ՀՄԿ –ն բազմիցս անմիջական կապի մեջ է մտել Հայաստանի կառավարության հետ: ՀՄԿ տնօրենների խորհուրդը հստակորեն ներկայացրել է այն գործողությունները և քայլերը, որոնք պահանջվում էին Հայաստանից ծրագիրը վերսկսելու համար: Կայացված որոշումը միտված չէ վիրավորելու հայ ժողովրդին, մասնավորապես, գյուղական համայնքների անապահով բնակչությանը: ՀՄԿ-ն գործակալություն է, որի նպատակն է օգնել աղքատներից աղքատներին և տնտեսական աճի միջոցով կրճատել աղքատությունը: Գործակալությունը, ելնելով օրենսդրական պահանջներից, պարտավոր է աշխատել այն երկրների հետ, որոնք բավարարում են ՀՄԿ-ի ցուցանիշներին:
«Նովոստի-Արմենիա» - Հնարավո՞ր է, արդյոք, որ ապագայում փոփոխվի կորպորացիայի տնօրենների խորհրդի որոշումը, և դրա համար ի՞նչ պետք է անեն Հայաստանի իշխանությունները
Մարի Յովանովիչ - ՀՄԿ-ի որոշումը բխում է Հայաստանի կառավարության` մի քանի կարևոր ցուցանիշների կատարողականը ժամանակի ընթացքում բարելավելու անկարողությունից: Մենք հուսով ենք, որ ժողովրդավարական կառավարման մեջ բարելավումներ կլինեն: Երբ տեսնենք շոշափելի բարելավում այդ ոլորտում, մենք ակտիվորեն կհամագործակցենք Հայաստանի կառավարության, ինչպես նաև մեր Կոնգրեսի հետ` գտնելու ֆինանսավորման այլ մեխանիզմներ:
«Նովոստի-Արմենիա» - Հնարավո՞ր է, որ դադարեցվի կորպորացիայի կողմից Հայաստանում իրականացվող մյուս ծրագրերի ֆինանսավորումը կամ կրճատվի դրանց ֆինանսավորման ծավալը
Մարի Յովանովիչ – ՀՄՀ Հայաստան ծրագրի ոռոգման համակարգի վերանորոգման, ինչպես նաև ֆերմերների ուսուցման բաղադրիչները շարունակվում են:
«Նովոստի-Արմենիա» - Տնօրենների խորհրդի որոշումը կապ ունի՞ համաշխարհային ֆինանսատնտեսական ճգնաժամի հետ, թե՞ այն բացատրվում է Հայաստանում ժողովրդավարության վիճակի վերաբերյալ մտահոգությամբ:
Մարի Յովանովիչ – ՀՄՀ-ն աշխատում է այն երկրների հետ, որոնք բավարարում են լավ կառավարման չափորոշիչներին, որոնք ներառում են քաղաքացիական ազատությունների և քաղաքական իրավունքների հանդեպ հարգանք, մամուլի ազատություն և օրենքի գերակայություն: ՀՄԿ-ն օրենսդրությամբ իրավասու է աշխատել միայն այն երկրների հետ, որոնք բավարարում են ՀՄԿ-ի ցուցանիշներին: Արդարացի կառավարման վեց ցուցանիշներից Հայաստանը բավարարում է միայն մեկին` կառավարման արդյունավետություն: Քաղաքական իրավունքի, քաղաքացիական ազատությունների, ձայնի և հաշվետվողականության մասով Հայաստանի ցուցանիշները միջինից բավականին ցածր են:
