Ազատ թռիչք. օդաչու Դիանա Սահակյանի «թևավոր» տուրիզմը (ՖՈՏՈ, ՎԻԴԵՈ)

ԵՐԵՎԱՆ, 12 սեպտեմբերի./Նովոստի–Արմենիա/. Ժամանակակից Հայաստանի տարածքում շատ են լեռնաշղթաներն ու ոլորապտույտ ճանապարհները, որոնք գերում են էքստրեմալ զբոսաշրջիկներին ու լեռնագնացներին։

Թվում է, թե փոքր ավիացիայի զարգացման համար կան բարենպաստ պայմաններ, բայց իրականում այս ոլորտի մակարդակն այդքան էլ բարձր չէ։ Գործում են միայն երկու քաղաքացիական օդանավակայաններ` «Զվարթնոցը» (Երևան) ու «Շիրակը» (Գյումրի)։

«Նովոստի–Արմենիա» գործակալության թղթակիցը զրուցել է մասնավոր օդաչու Դիանա Սահակյանի հետ, ով իր առջև նպատակ է դրել զարգացնել փոքր ավիացիան Հայաստանում։ 

31–ամյա Դիանան մասնագիտությամբ ռադիոլոգ է, սակայն փոքր տարիքից երազել է երկնքի մասին։ Ընտանիքի աջակցությամբ նա ձեռք է բերել Cessna 172 տիպի փոքր ինքնաթիռ, իսկ Եղվարդից ոչ հեռու կառուցվել է թռիչքուղի։

«Նախատեսում եմ զարգացնել տուրիստական ավիացիան, սանավիացիան և երկնքի հետ կապված շատ այլ ոլորտներ։ Ես ջանք ու եռանդ չեմ խնայի դրա համար», – նշում է Դիանան։

Դիանայի հետ հարցազրույցի ամբողջական տարբերակը կարող եք դիտել «Նովոստի–Արմենիա» գործակալության Youtube–յան ալիքում։–0–