Ողջ գիշեր տևած որոնումների արդյունքում փրկարարները հայտնաբերել են Խուստուփ լեռան տարածքում մոլորված 2 քաղաքացիներին (ՖՈՏՈ)
ԵՐԵՎԱՆ, սեպտեմբերի 18 /Նովոստի-Արմենիա/. Նախօրեին ՆԳՆ 112 օպերատիվ կառավարման կենտրոն ահազանգ է ստացվել, որ Խուստուփ լեռան տարածքում 2 քաղաքացի է մոլորվել, և անհրաժեշտ է փրկարարների օգնությունը:
Այս մասին հայտնում է ՆԳՆ Փրկարար ծառայությունը։
Ահազանգով Կապանի հրշեջ-փրկարարական ջոկատից անմիջապես դեպքի վայր է մեկնել մեկ մարտական հաշվարկ։ Որոնողական աշխատանքներին ներգրավվել են նաև 14 փրկարար և Էկոպարեկային ծառայության մեկ կարգախումբ։
Բարդ տեղանքում որոնողական աշխատանքները շարունակվել են ողջ գիշեր։
Ծավալուն որոնողական աշխատանքների արդյունքում առավոտյան՝ ժամը 11-ի սահմաններում, Վաչագան գյուղից 6 կմ դեպի Խուստուփ տանող ճանապարհին՝ Քոլ կոչվող հանդամասին հարակից անտառում, փրկարարները հաջողությամբ հայտնաբերել են մոլորված քաղաքացիներին։
