Արմավիրում գիշերային վեճն ավարտվել է դանակահարությամբ․ երկու եղբայր կալանավորվել են (ՎԻԴԵՈ)
ԵՐԵՎԱՆ, 30 հուլիսի․/Նովոստի–Արմենիա/․ Հուլիսի 15-ի գիշերը՝ ժամը 4-ին, «Արմավիր» բժշկական կենտրոնից ՆԳՆ օպերատիվ կառավարման կենտրոն ստացվել էր հաղորդում, որ կտրած-ծակած վերքերով բուժօգնության է դիմել Արմավիր քաղաքի բնակիչ 42-ամյա մի տղամարդ, հաղորդում է ՀՀ ոստիկանությունը։
Քրեական ոստիկանության Արմավիրի մարզային վարչության օպերատիվ խումբը պարզել էր, որ տղամարդը վնասվածքները ստացել է Արմավիրի Երևանյան փողոցում ծագած վիճաբանության ժամանակ։
Արմավիրի մարզային քննչական վարչությունում նախաձեռնվել էր քրեական վարույթ, և իրավապահների հետագա միջոցառումներով ամբողջացավ հանցագործության պատկերը։
Գիշերվա ժամը 3-ին վեճ էր ծագել 42-ամյա տղամարդու և նույն՝ Երևանյան փողոցի բնակիչ 25 ու 26 տարեկան եղբայրների միջև։
Սկսվել էր ծեծկռտուք, որի ընթացքում էլ ավագ եղբայրը, իր մոտ եղած դանակով, մի քանի հարված էր հասցրել տղամարդուն՝ պատճառելով ծանր մարմնական վնասվածք։
Հուլիսի 22-ին քրեական ոստիկանները ձերբակալել և նախաքննական մարմին են ներկայացրել եղբայրներին։ Հաջորդ օրը դատարանը նրանց նկատմամբ խափանման միջոց է կիրառել կալանքը, և եղբայրները տեղափոխվել են քրեակատարողական հիմնարկ։ Նախաքննությունը շարունակվում է։
Կարդացեք նաև․ Որպես անհետ կորած որոնվող 14–ամյա Վահե Ապիկյանը դպիր է Սբ Սարգիս եկեղեցում, գրություն է թողել, որ հրաժարվում է աշխարհիկ կյանքից և ցանկանում է դառնալ ճգնավոր
