ԵՐԵՎԱՆ, 19 հուլիսի. /Նովոստի-Արմենիա/. Ընդդիմադիր պատգամավոր Նիկոլ Փաշինյանը կոչ է արել ՊՊԾ գնդի զավթած շենքի մոտակայքում հավաքված ցուցարարներին չտրվել սադրանքների։
«Շենքի ներսում որևէ բախում չի եղել։ Ես խոսել եմ Վարուժան Սուքիասյանի հետ։ Նրանք կրակել են` ի նշան բողոքի, որ ոստիկանությունը բռնություն է կիրառում ցուցարարների նկատմամբ։ Նրանք պահանջում են, որպեսզի ոստիկանությունը չկիրառի բռնություն», – ասաց Փաշինյանը։
Նա նաև խնդրեց տարածել միայն հավաստի տեղեկություններ։
Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։
Միջադեպի կապակցությամբ ոստիկանությունը բերման էր ենթարկել ավելի քան 200 մարդու։
ՊՊԾ գնդի շենքը զավթած անձինք պահանջում են ազատել «Հիմնադիր խորհրդարան» արմատական ընդդիմադիր շարժման առաջնորդ Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։
Նախօրեին երեկոյան տասնյակ ցուցարարներ հավաքվել են ՊՊԾ գնդի զավթած շենքի մոտակայքում` պահանջելով չթույլատրել գրոհ զավթած շենքի անձանց նկատմամբ։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում