Սուրենյանը հրապարակել է ԱՄՆ–ին մոտեցող «Իրմա» թայֆունի տեսանյութը (ՎԻԴԵՈ)

ԵՐԵՎԱՆ, 6 սեպտեմբերի ./Նովոստի–Արմենիա/. ՀՀ ԱԻՆ Հիդրոմետ ծառայության Օդերևութաբանության կենտրոնի պետ Գագիկ Սուրենյանը հրապարակել է ԱՄՆ–ին մոտեցող «Իրմա» թայֆունի տեսանյութը։

«Ատլանտյան օվկիանոսից ԱՄՆ հարավ-արևելյան ափերին, մասնավորապես Ֆլորիդա նահանգին է մոտենում «Իրմա» անունով թայֆունը։ Այն համարվում է վերջին տասնամյակում ԱՄՆ ներխուժող ամենահզոր փոթորիկը, քամու արագությունը թայֆունում հասնում է 300կմ/ժ-ի», – նշել է օդերևութաբանը Facebook–յան էջում։


Սուրենյանը նաև տեղեկացնում է, որ այդ կապակցությամբ ԱՄՆ-ի նախագահ Դոնալդ Թրամփն արտակարգ դրություն է հայտարարել Ֆլորիդա նահանգում, Պուերտո Ռիկոյի ամերիկյան տարածքներում:

«Ներկա պահին թայֆունն անցնում է Փոքր Անտիլյան կղզիներով», – հայտնում է օդերևութաբանը։

Ֆլորիդայի նահանգապետ Ռիկ Սկոտը հրահանգել է հավաքել մինչև 30 հազար մարդ և պատրաստել չորս հազար բեռնատար, 100 ուղղաթիռ և օդային տարհանման անձնակազմեր, հայտնում է ՏԱՍՍ–ը։

«Նահանգի բոլոր պետական հաստատությունները փակ կլինեն սեպտեմբերի 8–ին»,– հայտարարել է Սկոտը։

Փոթորիկների դիտարկման ազգային կենտրոնի կանխատեսմամբ` «Իրման» կհասնի Պուերտո Ռիկոյի տարածքին չորեքշաբթի երեկոյան, իսկ Ֆլորիդայի հարավային հատվածին` կիրակի առավոտյան։–0–