ԵՐԵՎԱՆ, 3 ապրիլի․/Նովոստի–Արմենիա/․ Ութ հայ ձեռներեցներ ներառվել են
Forbes–ի աշխարհի դոլարային միլիարդատերերի 38–րդ վարկանիշում։
Forbes–ի կայքում հրապարակված ցանկի համաձայն, վարկանիշի 1104–րդ հորիզոնականում է արգենտինահայ գործարար Էդուարդո Էռնեկյանը՝ 3մլրդ դոլար ունեցվածքով, ռուսաստանաբնակ Սամվել Կարապետյանն ու Ալբերտ Ավդոլյանը կիսում են Forbes–ի 1143–րդ հորիզոնականը, նրանցից յուրաքանչյուրի ունեցվածքը գնահատվում է 2,9մլրդ դոլար։
Ծանոթությունների համար նախատեսված Bumble և Badoo հավելվածների և սոցցանցերի հիմնադիր, ռուսաստանցի գործարար Անդրեյ Անդրեևը (Անդրեյ Օհանջանյանց) զբաղեցրել է 1615–րդ հորիզոնականը՝ 2մլրդ դոլար ունեցվածքով։ Նրան է հետևում ամերիկահայ հեռուստաաստղ Քիմ Քարդաշյանը, նա զբաղեցրել է 1851–րդ հորիզոնականը՝ 1,7մլրդ դոլարով։
Fix Price–ի համահիմնադիր Արտյոմ Խաչատրյանը 1951–րդն է՝ 1,6մլրդ դոլարով, Moderna բիոտեխնիկական ընկերության համահիմնադիր, Flagship Pioneering–ի ղեկավար Նուբար Աֆեյանը զբաղեցրել է Forbes–ի վարկանիշի 2152–րդ հորիզոնականը՝ 1,4մլրդ դոլար ունեցվածքով։
Արցախի նախկին պետնախարար, ներդրող և բարերար Ռուբեն Վարդանյանն ու նրա ընտանիքը (Վարդանյանն այժմ կալանքի տակ է Ադրբեջանում) զբաղեցնում են 2545–րդ հորիզոնականը՝ 1,1մլրդ դոլարով։
Forbes–ի դոլարային միլիարդատերերի վարկանիշի առաջին հորիզոնականում է Louis Vuitton Moët Hennessy ընկերությունների խմբի նախագահ Բեռնար Առնոն, նրա ունեցվածքը կազմում է 233մլրդ դոլար, երկրորդը Tesla–ի, SpaceX–ի համահիմնադիր Իլոն Մասկն է՝ 195մլրդ դոլար, երրորդը Amazon–ի հիմնադիր Ջեֆ Բեզոսն է՝ 194մլրդ դոլար։-0-
