Շռայլ ծախսելու 5 «թաքնված» հատկանիշները

ԵՐԵՎԱՆ, 19 օգոստոսի./Նովոստի-Արմենիա/. Ամենաանհարմար պահին ձեր գումարը վերջացե՞լ է, այո–այո, բոլորիս ծանոթ իրավիճակ է: Իսկ քանի անգամ ենք մեղադրել ինքներս մեզ անվերահսկելի ծախսերի և փողերն աջ ու ձախ ցփնելու մեջ: Չնայած, մեր թեստի շնորհիվ կարծում ենք` հնարավորություն ունեցել եք պարզելու, թե ինչ տիպի մարդ եք: Եթե, այնուամենայնիվ, կասկածներ են մնացել, «Նովոստի-Արմենիա» գործակալությունն առաջարկում է ծանոթանալ շռայլ ծախսելու 5 «թաքնված» հատկանիշներին, որոնք կարևոր է ժամանակին բացահայտել ու արմատախիլ անել:

1. Դժվար է վերահսկել ծախսերը

Շռայլ ծախսելու հատկանիշներից մեկն այն է, երբ ձեզ դժվար է հաշվարկել ծախսերը և հստակ ֆիքսել ծախսած յուրաքանչյուր գումար: Որոշ դեպքերում բյուջեի վերահսկման նման ձևն ընդունելի է, սակայն երբ դուք աշխատավարձից աշխատավարձ եք ապրում կամ ձեզ երբեք չի հաջողվում գումար կուտակել, ապա դա վկայում է այն մասին, որ ժամանակն է հետևել ծախսերի ամեն կետին:

Դուք կարող եք չնկատել, թե որքան գումար է ծախսվում տաքսու, սրճարան այցելելու, տարբեր մանր, իմպուլսիվ գնումների վրա, թե ինչպես են դրանք ազդում բյուջեի վրա: Ձեր ծախսերը գրագետ ձևով հաշվարկելու դեպքում հնարավոր է սովորել ծրագրել և պարզել, թե ամիսը որքան կարելի է ծախսել ուտելիքի, ժամանցի, հագուստի և մնացածի վրա:

2. Հաշիվների վճարումները թողնում եք մինչև վերջին պահը

Շռայլ ծախսողները փորձում են հետաձգել անխուսափելի ծախսերը՝ պատկերացնելով, թե շատ գումար ունեն: Այդ պատճառով սառնարանի նորոգումը, կոմունալ վճարումները նախընտրում են թողնել մինչև վերջին պահը: Նման մարդիկ անհրաժեշտ ծախսերի համար նախատեսված գումարը ծախսում են ավելի պակաս անհրաժեշտ իրերի վրա:

Նման դեպքերում հաշիվները կարող են կուտակվել, ինչը հանգեցնում է սթրեսի և մեծ ծախսերի, երբեմն անգամ պարտք վերցնելու անհրաժեշտության (սա նույնպես շռայլության հետևանք է): Այս ամենի հետևանքով փող ունենալու ակնթարթային պատրանքը կարող է վերածվել իրական պարտքերի:

3. Չեք կարողանում գումար կուտակել խոշոր ծախսերի համար

Երկար ժամանակ պլանավորում եք մեքենա գնել, բայց ոչ մի կերպ չեք կարողանում գումար կուտակել, չէ՞ որ մեծ գնումների համար խնայելն ավելի դժվար է, քան փոքր ու առօրյա ծախսերը: Եթե ​​ մշտական ու իմպուլսիվ ծախսերը երկար ժամանակ խանգարում են միջոցներ կուտակել ավելի կարևոր և անհրաժեշտ գնումների համար, դուք պետք է ուշադրություն դարձնեք այս խնդրին և լուծում գտնեք:

Սկսեք հաշվարկել սեփական բյուջեն, ֆիքսել ծախսերը, կարող եք խնայողական հաշիվ բացել բանկում, որը կօգնի գումար կուտակել մեծ գնումներ կատարելու համար:

4. Շատ կրեդիտային քարտե՞ր եք կուտակել

Կրեդիտային քարտերը և մատչելի սպառողական վարկերը հնարավորություն են տալիս կատարել գնումներ՝ հետաձգելով վճարման պարտավորությունները: Կրեդիտային քարտեր օգտագործելիս մարդիկ առնվազն 10% ավել են ծախսում, քան դեբետային քարտերով կամ կանխիկով վճարելիս: Պատճառն այն է, որ վարկային գումարները չեն ընկալվում որպես սեփական փող, ուստի ավելի հեշտ է դրանց հրաժեշտ տալը: Կրեդիտային քարտերով նաև հեշտ է խրվել պարտքերի մեջ «ծախսիր այսօր, վճարիր հետո» սկզբունքի պատճառով:

Եթե դուք դժվարանում եք մարել վարկային քարտի ամսական վճարը և ստիպված եք օգտվել խնայողություններից, ապա սա արդեն առիթ է, որպեսզի հրաժարվեք վարկային քարտերից՝ նախընտրելով դեբետային քարտերը:

5. Գայթակղվում եք զեղչերով

Զեղչերն ուշադրություն են գրավում գունեղ գովազդային վահանակներով, բայց խանութների առաջարկները հաճախ այնքան էլ շահավետ չեն, որքան թվում են: Կարևոր է հիշել, որ այդ ամենը մարկետինգային հնարքներ են, որոնք հաճախ ստեղծում են պատրանք և ստիպում են գնել ապրանքներ, որոնք ձեզ իրականում հարկավոր չեն:

Նույնիսկ եթե դուք գնեք անպետք իր իրական 50% զեղչով, դա, միևնույնն է, ավելորդ ծախս է: Եվ հաճախ, գնումներից հետո տուն վերադառնալով, հասկանում եք, որ նոր իրը ձեզ այնքան էլ պետք չէ:

Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։–0–