Իրինա Ալեգրովայի երևանյան համերգը չեղարկվել է

ԵՐԵՎԱՆ, 28 փետրվարի. /Նովոստի–Արմենիա/. Իրինա Ալեգրովայի` մարտի 5-ին Երևանում կայանալիք համերգը տեխնիկական պատճառներով չեղարկվել է, «Նովոստի–Արմենիա» գործակալությանը հայտնեցին միջոցառման կազմակերպիչները։

«Հարգելի հանդիսատես, մարտի 5-ին Երևանում կայանալիք` Իրինա Ալեգրովայի համերգը տեխնիկական պատճառներով չեղարկվում է: Խնդրում ենք ըմբռնումով մոտենալ առաջացած հանգամանքերին, և հույս ունենք, որ Ալեգրովայի հանդիպումը երևանյան հանդիսատեսի հետ մոտ ժամանակներում կկայանա»,– ասվում է երգչուհու պաշտոնական կայքում։

Համերգի կազմակերպիչ «Ֆորպոստարտ պրոդաքշն» ընկերությունը տեղեկացնում է, որ Իրինա Ալեգրովայի` մարտի 5-ին նախատեսված և երգչուհու Ադմինիստրացիայի կողմից չեղարկված համերգի բոլոր վաճառված տոմսերը ենթակա են վերադարձի:

Ընկերությունը հայտարարում է, որ տոմսերի հետ ընդունման գործընթացն ամբողջությամբ կիրականացվի մինչև ս/թ մարտի 5-ը: Տոմսերը ենթակա են վերադարձման այն տոմսարկղերում, որտեղից դրանք ձեռք են բերվել:

Սա առաջին նմանատիպ դեպքը չէ Հայաստանում Ալեգրովայի ելույթի հետ կապված։ Ավելի վաղ նմանատիպ դեպք է տեղի ունեցել 2015 թվականին, երբ Ալեգրովայի համերգը չեղարկվել է բառացիորեն ելույթից առաջ երգչուհու վատ ինքնազգացողության պատճառով։ Այնուհետև համերգը տեղափոխվել է ապրիլի 6–ին և վերջապես կայացել է մայիսի 23–ին։ -0-