ԵՐԵՎԱՆ, 7 մայիսի. /Նովոստի–Արմենիա/. Կլոդ Մոնեի «Ջրաշուշանները» վաճառվել են Նյու Յորքի Christie's աճուրդում 27 միլիոն դոլարով, երեքշաբթի երեկոյան իմպրեսիոնիզմի և մոդեռնիզմի դասականների ստեղծագործությունների վաճառքից հետո հայտնել է աճուրդի տունը, հաղորդում է «ՌԻԱ Նովոստին»։
Կլոդ Մոնեի «Ջրաշուշանները» («Nympheas») ստեղծվել է 1907 թվականին Ֆրանսիայի Ժիվերնի տեղանքում։ «Ջրաշուշանները» ռեկորդակիր են ոչ միայն Christie's–ի, այլ նաև հենց հեղինակի համար։ 2008 թվականին Մոնեի` 1919 թվականի նկարը, որտեղ նույնպես ջրաշուշաններ են պատկերված, վաճառվել էր 80.4 միլիոն դոլարով։
«Կնոջ դիմանկարը» («Dora Maar»), որտեղ Պաբլո Պիկասոն նկարել է իր մուսա և սիրուհի Դորա Մաարին, գերմանացի կոլեկցիոներներ Վիկտոր և Մարիաննա Լանգենների հավաքածուից վաճառվել է 22.656 միլիոն դոլարով` առաջարկված 25-35 միլիոն դոլարի արժեքից մի փոքր պակաս։
Վասիլի Կանդինսկու` 1909 թվականի Strandszene ստեղծագործությունը, նույնպես Լանգենի հավաքածուից, նոր տիրոջը գտել է 17.189 միլիոն դոլարով, նկարի էսթիմեյթը կազմել էր 16-22 միլիոն դոլար։ Իտալացի վարպետ Ամադեո Մոդիլյանիի «Նստած շիկահեր երիտասարդը» («Jenue Homme Roux Assis») նկարը վաճառվել է 17.637 միլիոն դոլարով` առաջարկած 12 միլիոն դոլարի արժեքից ավելի բարձր գնով։
Ընդհանուր առմամբ, Christie's–ի տեղեկացմամբ, երեկոյան վաճառքում իրացվել է ավելի քան 285.88 միլիոն դոլարի ստեղծագործություն։ -0-
