Երևանցիները կծանոթանան ժամանակակից ճապոնական ստեղծագործություններին

ԵՐԵՎԱՆ, 21 հոկտեմբերի. /Նովոստի–Արմենիա/. Երևանցիները կծանոթանան ժամանակակից ճապոնական ստեղծագործություններին «Ավանդույթից` արդիականություն» հայ–ճապոնական ցուցահանդեսի շրջանակում, որը կանցկացվի հոկտեմբերի 22–23–ը, չորեքշաբթի լրագրողներին ասաց միջոցառման համակազմակերպիչ, «Էյբիք» հայ–ճապոնական ընկերության տնօրեն Վարդիթեր Հարությունյանը։

«2006 թ.–ից «Էյբիք» ընկերությունը համագործակցում է «Galeria Ginza I Chome» ճապոնական տաղավարի հետ (տնօրենը` Մակի Միկիկո), Հայաստանում և Ճապոնիայում պարբերաբար կազմակերպում է անհատական և խմբային ցուցահանդեսներ։ Այս տարի ցուցահանդեսը նվիրվում է հունվարից Հայաստանում գործող Ճապոնիայի դեսպանատան բացմանը», – ասաց նա։

Հարությունյանը նշեց, որ 2015 թ.– մարտին նմանատիպ ցուցահանդես է անցկացվել Ճապոնիայում, որին մասնակցել են ավելի քան 120 հայ և ճապոնացի արվեստագետներ։

 Ցուցահանդեսի բացումը տեղի կունենա հոկտեմբերի 22–ին Երևանի պատմության թանգարանում, իսկ հոկտեմբերի 23–ին այն կանցկացվի Հովհաննես Շարամբյանի անվան ժողովրդական ստեղծագործության կենտրոնում։

Հարությունյանն ավելացրեց, որ ցուցահանդեսին կներկայացվեն 12 ճապոնացի և 9 հայ նկարիչների ստեղծագործությունները (գեղանկարչություն, քանդակագործություն, կիրառական արվեստի նմուշներ)։

Քանդակագործ Աշոտ Հարությունյանն իր հերթին ավելացրեց, որ հայ արվեստագետներին շատ է հետաքրքրում Ճապոնիայի ժամանակակից եռաչափ արվեստը, տարբեր նյութերի օգտագործումը` սկսած տեքստիլից մինչև մետաղ, միաժամանակ ճապոնացիներն էլ հետաքրքրվում են ժամանակակից հայկական արվեստով։

«Այս ցուցահանդեսի միջոցով հայ արվեստասերները հնարավորություն կունենան ծանոթանալ ժամանակակից ճապոնական արվեստին, ինչպես նաև հայ ժամանակակից նկարիչների աշխատանքներին», – ավելացրեց Հարությունյանը։ Ցուցահանդեսը կտևի մինչև հոկտեմբերի 30–ը։–0–