ԵՐԵՎԱՆ, 19 փետրվարի. /Նովոստի–Արմենիա/. Երևանում ուրբաթ բացվել է Չինական ամանորյա բացիկների ցուցահանդեսը Չինական ամանորին կամ Գարնան տոնին նվիրված տոնակատարությունների ավարտի կապակցությամբ։
Գարնան տոնը նվիրված է ձմեռային նորալուսնին։ Չինացիների կարծիքով` գարնան այդ առաջին օրը բնությունը զարթոնք է ապրում։ Չինական ամանորը 2016 թ.–ին մեկնարկել է փետրվարի 8–ին, տոնակատարություններն, ըստ ավանդույթի, տևել են շուրջ երկու շաբաթ։
«Այս աննախադեպ միջոցառումն առաջին անգամ է անցկացվում աշխարհում գործող Կոնֆուցիոսի ինստիտուտների գործունեության շրջանակում», – լրագրողներին ասաց Երևանի Բրյուսովի անվան պետական լեզվաբանական համալսարանին կից գործող Կոնֆուցիոսի ինստիտուտի տնօրեն Գոռ Սարգսյանը։
Նրա խոսքով` չինական ամանորյա բացիկները պատրաստել են 42 հայկական դպրոցների 500 աշակերտներ։ Բոլոր մասնակիցները ստացել են հավաստագրեր և խրախուսական նվերներ։
«Նմանատիպ միջոցառումները նպաստում են Հայաստանում չինական մշակույթի զարգացմանն ու տարածմանը։ Ե՛վ մենք, և՛ մեր չինացի գործընկերները զարմացել էինք այն փաստից, թե որքան մոտ է Չինաստանի մշակույթը հայ դպրոցականներին։ Ներկայացված աշխատանքները գերազանցեցին մեր սպասումները», – ասաց Սարգսյանը։
Հայաստանում Չինաստանի արտակարգ և լիազոր դեսպան Տյան Էրլունն իր հերթին նշեց, որ Ամանորը ամենահանդիսավոր և սիրված տոն է և՛ Հայաստանում, և՛ Չինաստանում։
«Հայ դպրոցականների պատրաստած չինական բացիկների ցուցահանդեսը կօգնի նրանց ավելի շատ բան իմանալ չինական ամանորի և չինական սովորույթների մասին։ Մեր մարդասիրական համագործակցության առաջնահերթ ուղղությունն այն է, որ ժողովուրդները և հատկապես երեխաներն ավելի շատ բան իմանան միմյանց մասին», – ասաց Էրլունը։
Նա դրական գնահատեց Հայաստանի և Չինաստանի միջև իրականացվող մարդասիրական համագործակցության զարգացումը, հատկապես` կրթության և մշակույթի ոլորտում։
«Ե՛վ Չինաստանը, և՛ Հայաստանն ունեն հարուստ պատմություն և մշակութային ավանդույթներ։ Կարծում եմ, որ այս ուղղությամբ իրականացվել է մեծ աշխատանք, սակայն կարելի է ավելի շատ բան անել։ Կրթության ոլորտում համագործակցության մեծ հեռանկարներ եմ տեսնում», – ասաց Էրլունը։
Չինական ամանորյա բացիկների վրա գերիշխում են կարմիր երանգները, դրանք երջանկություն և առատություն են խորհրդանշում։ Չինաստանում ընդունված է Ամանորին հարազատներին և հատկապես երեխաներին նվիրել բացիկներ, որոնց վրա պատկերված են «երջանիկ» հիերոգլիֆներ, որոնք խորհրդանշում են առողջություն, երջանկություն և բարգավաճում։ –0–
