ԵՐԵՎԱՆ, 20 հոկտեմբերի. /Նովոստի–Արմենիա/. Հոկտեմբերի 19-ին «Արամ Խաչատրյան» լեփ-լեցուն համերգասրահում կայացավ ամերիկահայ ռոք երաժիշտ, կոմպոզիտոր Սերժ Թանկյանի «Օրկա» սիմֆոնիայի հայաստանյան պրեմիերան։
Չորս մասից բաղկացած մեծակտավ երաժշտական այս գործում Թանկյանը մտորում է մարդասիրության մասին։
Սիմֆոնիայում նկարագրված է մարդկային լավ ու վատ կողմերի պայքարը, դժվարին փորձությունները, ինքնավերլուծությունը և ի վերջո` լույսի հաղթանակը։
Թանկյանի ստեղծագործությունը բուռն ծափահարություններով ընդունվեց հանդիսատեսի կողմից, այդ ջերմ ծափողջույնների ներքո էլ բեմ բարձրացավ հեղինակը։
«Հայաստանում իմ սիմֆոնիան Երիտասարդական նվագախմբի կողմից ներկայացնելն ինձ համար հիանալի մի բան է։ Ճիշտն ասած, շատ տպավորված, հիացած և հուզված եմ։ Շնորհակալությունս եմ հայտնում Հայաստանի պետական երիտասարդական նվագախմբին և Սերգեյ Սմբատյանին ֆանտաստիկ աշխատանքի համար։ Այսօր մտածում էի, որ մեր երկրի գանձերը գետնի տակ չեն, այստեղ են՝ այս բեմում, մեր մշակույթը, մեր երաժիշտներն են, որոնց պետք է միշտ քաջալերենք»,- ասել է Սերժ Թանկյանը, հաղորդում է նվագախմբի մամուլի ծառայությունը։
Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը մեծ ձեռքբերում է անվանել այն փաստը, որ համաշխարհային մասշտաբի ռոք երաժիշտը կարևորում է նաև սիմֆոնիկ ժանրը և գրում սիմֆոնիկ գործեր։
«Սերժ Թանկյանն այն կոմպոզիտորն է, ում երաժշտությունը պետք է շատ հնչի, ում փիլիսոփայության հետ շատերը պետք է հաղորդակցվեն։ Եվ մենք ուրախ ենք Թանկյանի արվեստն ու գաղափարախոսությունը մարդկանց փոխանցելու համար»,- ասել է Սերգեյ Սմբատյանը։
Խաչատրյանական փառատոնի շրջանակում կայացած երեկոյի ընթացքում հնչել է նաև Արամ Խաչատրյանի Դաշնամուրի կոնցերտը։
Հայաստանի պետական երիտասարդական նվագախմբի հետ որպես մենակատար է ելույթ ունեցել դաշնակահար Լևոն Կարապետյանը։
Հիշեցնենք, որ Խաչատրյանի միջազգային փառատոնն անցկացվում է ՀՀ նախագահի հովանու ներքո։ Փառատոնը կազմակերպել է Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ)՝ ՀՀ մշակույթի նախարարության, «Խաչատրյան» և Մշակույթի աջակցության եվրոպական հիմնադրամների աջակցությամբ։–0–
