ԴիԿապրիոն մեկնաբանել է իր հաղթանակը

ԵՐԵՎԱՆ, 29 փետրվարի. /Նովոստի–Արմենիա/. Հոլիվուդյան դերասան Լեոնարդո ԴիԿապրիոն, ով արժանացավ «Օսկարի» «Լավագույն դերասան» անվանակարգում, բեմում ելույթի ժամանակ շնորհակալություն է հայտնել կինոակադեմիային և իր գործընկերներին, ինչպես նաև հիշեցրել է կլիմայական խնդիրների մասին։ Դերասանի խոսքերը մեջբերում է Lenta.ru–ն` հղում անելով Reuters–ին։

«Եկե՛ք չընդունենք մեր մոլորակը որպես արդեն իսկ տրված մի բան: Ես չեմ ընդունում նաև այսօրվա պարգևատրումն այդկերպ: Կլիմայական փոփոխություններն իրական են, դա տեղի է ունենում հենց հիմա: Մենք պետք է միասին աշխատենք», – նշել է ԴիԿապրիոն։

Լեոնարդո ԴիԿապրիոն` «Լավագույն դերասան»>>

ԴիԿապրիոն ռեժիսոր Ալեխանդրո Գոնսալես Ինյարիտուի «Փրկվածը» (The Revenant) ֆիլմում մարմնավորել է որսորդ Հյու Գլասսի կերպարը։ ԴիԿապրիոն արդեն վեցերորդ անգամ էր առաջադրվում «Օսկարի»։

«Լավագույն դերասան» անվանակարգում առաջադրվել էին նաև Բրայան Քրենսթոնը («Թրամբո»), Մեթ Դեյմոն («Մարսեցին»), Մայքլ Ֆասբենդերը («Սթիվ Ջոբս») և Էդդի Ռեդմեյնը («Աղջիկը Դանիայից»)։

Մեքսիկացի ռեժիսոր Ալեխանդրո Գոնսալես Ինյարիտուն երկրորդ անգամ արժանացավ «Օսկարի» «Լավագուն ռեժիսոր» անվանակարգում։

Ինյարիտուի հետ «Օսկարի» համար պայքարում էին Թոմաս Մաքքարթին («Ուշադրության կենտրոնում»), Ադամ Մաքքեյը («Իջեցման խաղ»), Ջորջ Միլլերը («Խենթ Մաքսը. Զայրույթի ճանապարհը») և Լեոնարդ Աբրահամսոնը («Սենյակ»)։

ԴիԿապրիոն հետաքրքրվում է բնապահպանական հարցերով, նա 1998 թ.–ին հիմնադրել է սեփական բնապահպանական հիմնադրամը։ Կազմակերպությունն աջակցում է Կալիֆոռնիայում իրականացվող մի շարք նախագծերի, վեբ–կայքի միջոցով քարոզում է բնապահպանական ակցիաները։ Դերասանին, մասնավորապես, մտահոգում է ամուրյան վագրերի պահպանման և պոպուլյացիայի ավելացման հարցը։ –0–