Մոսկվայում հույս ունեն, որ մինչև տարեվերջ Օբաման կայցելի ՌԴ. Լավրով
ԵՐԵՎԱՆ, 2 հունիսի. /Նովոստի-Արմենիա/. Մոսկվան հուսով է, որ ԱՄՆ նախագահ Բարաք Օբաման մինչև տարեվերջ կայցելի Ռուսաստան, հինգշաբթի Bloomberg գործակալությանը տված հարցազրույցում հայտարարել է ՌԴ արտգործնախարար Սերգեյ Լավրովը:
«Այո, նախագահ Օբամային հրավիրել են Ռուսաստան, նրան հրավիրել է նախագահ Մեդվեդևը նախորդ տարի Վաշինգտոն կատարած այցի ընթացքում: Մենք հուսով ենք, որ ԱՄՆ նախագահի այցը կկայանա մինչև տարեվերջ», - ասել է նախարարը:
Լավրովը նաև տեղեկացրել է, որ ԱՄՆ պետքարտուղար Հիլարի Քլինթոնն իրեն հրավիրել է այցելել Վաշինգտոն և քննարկել Մոսկվա Օբամայի այցի նախապատրաստական աշխատանքները:
«Այժմ մենք քննարկում ենք իմ այցելության ամսաթվի հարցը, այն, միգուցե, տեղի ունենա ամռան կեսին: Հուսով եմ, որ մենք շուտով կիմանանք Օբամայի այցի ավելի կոնկրետ ժամկետները», - նշել է նախարարը:-0-
