Մեդվեդևը եռակողմ հանդիպում է անցկացրել Հայաստանի և Ադրբեջանի նախագահների հետ
ՌԴ նախագահ Դմիտրի Մեդվեդևը եռակողմ հանդիպում է անցկացրել Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ, հաղորդում է ՌԻԱ Նովոստին։
Երեք պետությունների ղեկավարները միասին մտել են Կոնստանտինովյան պալատի սրահներից մեկը, որտեղ անցկացվում էր հանդիպումը։ «Սա արդեն մեր երեքի վեցերորդ հանդիպումն է, վեց անգամ արդեն հանդիպել ենք՝ դա քիչ չէ»,- ասել է Մեդվեդևը։
Լրագրողների ներկայությամբ երեք երկրների նախագահների զրույցը եղել է եղանակի շուրջ։ Ռուս նախագահն ափսոսանքով նշել է, որ Սանկտ Պետերբուրգում այժմ այդքան էլ տաք չէ։
«Այս օրերին սովորաբար, չգիտես ինչու, ցրտում է, թեև ավելի տաք է եղել՝ մայիսը մեզ մոտ շատ տաք էր, Մոսկվայում և Պետերբուրգում աննորմալ տաք էր»,- ասաց նա։
Այնուհետև հանդիպման սկիզբը լուսաբանող լրագրողները լքել են բանակցությունների սրահը։ -0-
