ԱՊՀ երկրների երիտասարդությունը մասնակցում է «Բարեկամություն առանց սահմանների» համաժողովին

Միջազգային երիտասարդական «Բարեկամություն առանց սահմանների» համաժողովը, որին մասնակցում են  երիասարդական միավորումների և կազմակերպությունների առաջնորդները, բուհական և դպրոցական ինքնավարության ակտիվիստները, ԱՊՀ ութ երկրների հասարակական կարծիքի առաջնորդները, անցկացվում է Բելառուսում, «Նովոստի-Արմենիային» հայտնեց ԱՊՀ մասնակից պետություների հումանիտար համագործակցության միջազգային հիմնադրամի մամուլի քարտուղար Ալեքսանդր Կալուգինը։

«Համաժողովը, որը հիմնադրվել է Բելառուսի հանրապետության կրթության  նախարարության կողմից, անցկացվում է երկրորդ տարին անընդմեջ «Զուբրյոնոկ» ազգային մանկական կրթա-առողջարարական կենտրոնում՝ ԱՊՀ մասնակից պետություների հումանիտար համագործակցության միջազգային հիմնադրամի աջակցության շնորհիվ»,- ասվում է ՀՀՄՀ հաղորդագրությունում։

Համաժողովի հանդիսավոր բացումը տեղի կունենա հունիսի 1-ին, իսկ կավարտվի հունիսի 6-ին։
 
Համաժողովի ծրագրով նախատեսված են բանավիճային հանդիպումներ, երիտասարդական քաղաքականության, կրթության, հայրենասիրական և միջազգային դաստիրակության, էկոլոգիական ակցիաների անցկացման հարցերով կլոր սեղաններ։

Համաժողովի ամեն օրը նվիրված է Համագործակցության երկրներից մեկին, որի շրջանակներում երիտասարդական միջոցառման մասնակիցները կծանոթանան նրա պատմությանը, ավանդույթներին և նույնիսկ ազգային խոհանոցին։

Համաժողովի կենտրոնական իրադարձությունը կդառնա «ԱՊՀ երկրների երիտասարդության օրը», որի շրջանակներում կքննարկվեն զանազան երիտասարդական նախագծեր և նախաձեռնություններ, հայտնի և ականավոր մարդկանց հետ հանդիպումներ։

«Նման միջոցառումների անցկացումը նպաստում է միջազգային երիտասարդական համագործակցության զարգացմանը, բարիդրացիական հարաբերությունների ամրապնդմանը, հարևանների մասին  երիտասարդների պատկերացման ընդլայնմանը»,- ՀՀՄՀ գործադիր տնօրեն Արմեն Սմբատյանի խոսքը մեջբերեցին հաղորդագրությունում։

Համաժողովին մասնակցում են Հայաստանի, Բելառուսի, Ղազախստանի, Ղրղզստանի, Մոլդովայի, Ռուսաստանի, Ադրբեջանի և Տաջիկստանի ներկայացուցիչները։ Մասնակիցների տարիքը 13-25 է։ -0-