Ընդդիմությունը զատկի հավկիթներ կներկի Սահակաշվիլու նստավայրի առջև

ԵՐԵՎԱՆ, 17 ապրիլի. /Նովոստի-Արմենիա/.  Նախագահ Միխայիլ Սահակաշվիլու հրաժարականը պահանջող վրացական ընդդիմության ներկայացուցիչներն Ավագ ուրբաթ երեկոյան մեծ կաթսայում զատկի հավկիթներ կներկեն Թբիլիսի քաղաքի Հավլաբար շրջանում, վրաց պետության ղեկավարի նստավայրի առջև, հաղորդում է «Նովոստի-Գրուզիա» գործակալությունը՝ հղում անելով «Շարժում հանուն Միասնական Վրաստանի» կուսակցության մամուլի ծառայությանը։

Նստավայրի մոտ, ուր ապրիլի 13-ից ակցիաներ է անցկացվում և վրանային քաղաք է տեղակայված, կհավաքվեն ընդդիմության առաջնորդները։

Ընդդիմության ակցիաներն անցկացվում են Վրաստանում ապրիլի 9-ից։ Դրանց մասնակցում են երկրի ընդդիմադիր առաջատար ուժերը՝ Վրաստանի խորհրդարանի նախկին խոսնակ, առաջնորդ Նինո Բուրջանաձեի «Ժողովրդավարական շարժում՝ Միասնական Վրաստան» կուսակցությունը, Պաշտպանության նախկին նախարար Իրակլի Օքրուաշվիլու հիմնած «Շարժում միասնական Վրաստանի համար» կուսակցությունը, Սալոմե Զուրաբիշվիլու «Վրաստանի ուղի» կուսակցությունը, «Կոալիցիա ազատության համար», Պահպանողական կուսակցությունը, ինչպես նաև ՄԱԿ-ում Վրաստանի նախկին դեսպան Իրակլի Ալասանիայի «Դաշինք Վրաստանի համար» քաղաքական ուժը։  

Զատկի տոների ընթացում՝ մինչև երեքշաբթի, ընդդիմությունն նվազեցնում է ակցիաների մասշտաբները։ Այդ օրերին կշարունակվեն ակցիաներ, նախագահականի, Հանրային հեռուստատեսության մոտ, սակայն զանգվածային հանրահավաքներ չեն լինի։ Երեքշաբթի օրվանից, ինչպես հայտնում են ընդդիմության առաջնորդները, ակցիաները կվերսկսվեն նոր ուժով՝Թբիլիսու բնակիչներին կմիանան ընդդիմության կողմնակիցնեչը երկրի տարբեր շրջաններից։ -0-